Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 202 Hüküm no: 174 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dâyezade Mustafa Ağa’nın vakfettiği evin tevliyetinin Hasan b. Abdullah’a verildiği Bi-imzâ-i efendi Tevliyet Ashâb-ı hayrâtdan merhûm Dâyezâde Mustafa Ağa’nın mahmiye-i İstanbul’da Sofular mahallesinde vakfeylediği ma‘lûmü’l-hudûd ve’l-müştemilât menzilin vakfiye-i ma‘lûmün-bihâsı mantûkunca süknâ ve galle ve tasarruf ve tevliyetine kıbel-i şer‘den mütevellîye nasb u ta‘yîn olunan Fâtıma Hatun fevt olup tevliyet-i mezbûre mahlûle olmağla işbu bâ‘isü’l-vesîka Hasan b. Abdullah nâm kimesne her vechile mahal ve müstahık olmağın tevliyet-i mezbûreye vazîfe-i mersûmesiyle mütevellî nasb u ta‘yîn olundukda ol dahi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Muharremi’l-harâm sene 1153. Şuhûdü’l-hâl: Salih Çelebi b. Süleyman, el-Hâc Mustafa b. Hacı Mehmed, Ahmed b. Hacı Mehmed, İbrahim b. Mustafa