Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 203 Hüküm no: 175 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’dan boşanan Hatice’nin kocasından alacağı mehir ve nafaka davasına sulh bedeli karşılığı son verdiği Sulh Mahmiye-i İstanbul’da Haraccı Muhyiddin mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Şerife Hadîce bt. Mustafa nâm hatun meclis-i şer‘-i şerîf-i enverde zevc-i sâbıkı Mustafa Ağa b. Hasan nâm kimesne mahzarında ikrâr ve takrîr-i kelâm edip mezbûr Mustafa Ağa zevcim olup târîh-i kitâbdan dokuz gün mukaddem beni bâyinen tatlîk etmekle zimmetinde mütekarrer ve ma‘kūdün-aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem ve me’ûnet-i süknâmı mezbûr Mustafa’dan taleb ederim deyü da‘vâya tasaddî etmiş idim, el-hâletü hâzihi beynimizde muslihûn tavassut edip da‘vâ-yı mezkûremden beni mezbûr Mustafa Ağa ile on guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezkûru kabûl ve bedel-i sulh olan meblağ-ı mezbûr on guruşu mezbûr Mustafa Ağa yedinden tamâmen ahz u kabz eylediğimden sonra hukūk-ı zevciyete ve târîh-i kitâba gelince sâire müte‘allıka âmme-i da‘vâdan mezbûr Mustafa Ağa’nın zimmetini ibrâ-i âmm-ı katı‘u’n-nizâ‘la ibrâ ve ıskāt ol dahi kezâlik hukūk-ı zevciyete ve ber-mûceb-i defter-i müfredât iddi‘â eylediği eşyâ-i ma‘lûmeye ve târîh-i kitâba gelince sâire müte‘allıka âmme-i da‘vâdan benim zimmetimi ibrâ-i âmm-ı katı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Muharrem sene 1153. Şuhûdü’l-hâl: Mehmed Ağa b. Süleyman, Hüseyin Çelebi b. İbrahim, Hasan b. Mehmed, Mahmud Beşe b. İbrahim, Abdullah Beşe b. Ramazan, es-Seyyid Mustafa b. es-Seyyid Hasan, Mehmed Çelebi b. Mustafa, Süleyman b. Ahmed, Ali Beşe b. Abdullah, Osman Ağa b. Ebubekir