Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 204 Hüküm no: 176 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in çocukları Zeyneb ve Hafize’ye nafaka takdiri Nafaka Mahmiye-i İstanbul’da Üskübî mahallesinde sâkine olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Âişe bt. Mehmed nâm hatun meclis-i şer‘-i şerîf-i enverde zevc-i sâbıkı İsmail Beşe b. Halil nâm kimesne mahzarında takrîr-i kelâm ve bast-ı merâm edip mezbûr İsmail Beşe zevcim olup bundan akdem beni bâyinen tatlîk etmekle mezbûrun firâşından hâsıla ve benden mütevellide ve bi-hakkı’l-hıdâne hacr ve terbiyemde olan işbu sulbiye kızları Zeyneb ve Hafize nâm sagīretânın mâlları olmamağla nafaka ve kisveye ihtiyâcları olmağın babaları mezbûr İsmail Beşe üzerine kıbel-i şer‘-i enverden kadr-ı ma‘rûf nafaka ve kisve-bahâ akçe farz ve takdîr olunmak murâdımdır dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīretân-ı mezbûretânın her birine nafaka ve kisve-bahâları’çün babaları mezbûr İsmail Beşe üzerine târîh-i kitâbdan yevmî yedişer akçeden cem‘an on dört akçe farz ve takdîr edip meblağ-ı mefrûz-ı mezbûru sagīretân-ı mezbûretân Zeyneb ve Hafize’nin nafaka ve kisve-bahâ ve sâir levâzım-ı zarûriyelerine harc ü sarfa ve lede’l-iktizâ istidâneye ve inde’z-zafer mezbûr İsmail Beşe üzerine rücû‘a mezbûre Âişe Hatun’a izin vermeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Muharremi’l-harâm sene 1153. Şuhûdü’l-hâl: Ali Çelebi b. Abdullah, Mübâşir Mustafa Çelebi b. (°), Mehmed Çelebi b. Abdullah