Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 204 Hüküm no: 177 Orijinal metin no: [25a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Musli’nin bazı eşyalarını oğlu Yahya’ya sattığı Mübâya‘a-i eşyâ Mahmiye-i İstanbul’da Oruc Gāzî mahallesinde sâkine olup zâtı Mehmed Efendi b. Mustafa ve el-Hâc Süleyman b. Hacı Hasan ta‘rîfleriyle mu‘arrefe olan Fâtıma bt. el-Hâc Musli nâm hatun meclis-i şer‘-i hatîr-ı lâzımü’t-tevkīrde sadrî kebîr oğlu bâ‘is-i hâze’l-kitâb Yahya b. Abdullah nâm kimesne mahzarında ikrâr ve takrîr-i kelâm edip eşyâ-i memlûkemden otuz miskāl bir çift altın bilezik ve bir inci kuşak ve bir sîm kuşak ve bir çift zümrüd küpe ve bir sincab kürk ve bir kaneviz cübbe ve on yasdık ve dört minder ve iki döşek ve iki yemenî mak‘ad ve bir şilte ve beş yorgan çârşeb ve üç döşek çârşebi ve bir orta keçesi ve iki ihrâm ve iki anteri ve bir çintiyân ve bir altın yüzük ve altı tencere ve yedi sahan ve üç lengeri ve bir bakraç ve bir leğen ma‘a ıbrık ve bir güğüm ve iki kebçe ve bir sini ve üç kahve ıbrığı ve bir tasımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile oğlum mezbûr Yahya’ya safka-i vâhide ile iki yüz elli guruşa [25b] bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz elli guruş mutâlebesinden oğlum mezbûr Yahya’nın zimmetini ibrâ ve ıskāt eyledim ba‘de’l-yevm eşyâ-i muharrere-i mezkûrede benim kat‘an alâka ve medhalim kalmayıp oğlum merkūmun mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Muharremi’l-harâm sene 1153. Şuhûdü’l-hâl: Hasan Ağa b. Mehmed, Cebeci Odabaşısı Mustafa Ağa, Miskçi Ömer Çelebi b. Abdullah, Sipâhi Mustafa Ağa, el-Hâc Hasan b. Abdullah, İmâm Ahmed Efendi, el-Hâc Kasım b. Abdülbaki