Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 205 Hüküm no: 178 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa’nın çocukları Mehmed ve Rukiye’ye nafaka takdiri Nafaka Mahmiye-i İstanbul’da Haraccı Muhyiddin mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Şerife Hadîce bt. Mustafa nâm hatun meclis-i şer‘-i hatîr-ı lâzımü’t-tevkīrde zevc-i sâbıkı Mustafa Ağa b. Hasan nâm kimesne mahzarında takrîr-i kelâm ve ta‘bîr ani’l-merâm edip mezbûr Mustafa Ağa’nın firâşından hâsıllar ve benden mütevellidler hâlâ bi-hakkı’l-hıdâne hacr ve terbiyemde olan işbu sadrî sagīr oğlum es-Seyyid Mehmed ve sagīre kızım Şerife Rukiye’nin mâlları olmayıp nafaka ve kisveye ihtiyâcları olmağla sagīrân-ı mezbûrânın nafaka ve kisve ve sâir levâzım-ı zarûriyesi’çün babası mezbûr Mustafa Ağa üzerine kıbel-i şer‘den kadr-ı kifâye akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-i mezbûrân es-Seyyid Mehmed ve Şerife Rukiye’nin nafaka ve kisve ve sâir levâzım-ı zarûriyeleri’çün babası mezbûr Mustafa üzerine târîh-i kitâbdan bi’t-terâzi her birine yevmî onar akçeden cem‘an yirmi akçe nafaka ve kisve-bahâ farz ve takdîr edip meblağ-ı mefrûz-ı mezkûru sagīrân-ı mezbûrânın nafaka ve kisve ve sâir levâzım-ı zarûriyelerine harc ü sarfa ve lede’l-iktizâ istidâneye ve inde’z-zafer babaları mezbûr Mustafa Ağa üzerine rücû‘a mezbûre Şerife Hadîce Hatun’a izin birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Muharremi’l-harâm sene 1153. Şuhûdü’l-hâl: Hasan b. İbrahim, Hasan b. Mehmed, Mehmed b. İbrahim, Abdülbaki b. Ramazan, es-Seyyid Mustafa Ruhalı, Mehmed b. Süleyman, Süleyman b. Ahmed Ali b. Abdullah, Osman Ağa b. Ebubekir, İbrahim b. (°)