Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 206 Hüküm no: 180 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ahmed’in varislerinden Ayşe ve Mehmed Odabaşı arasındaki tereke davasına sulh bedeli karşılığı son verildiği Sulh Mahmiye-i İstanbul’da Alacaçeşme kurbünde sâkine iken bundan akdem vefât eden Fâtıma bt. Ahmed b. Abdullah’ın verâseti zevci Mehmed Odabaşı b. Ahmed’e ve anası Âişe bt. Mehmed ve sadrî oğulları Hasan ve Hüseyin ve Mehmed ile sadriye kızı Hadîce’ye münhasıra olup kable’l-kısmet mezbûrûn Hasan ve Hüseyin ve Mehmed ve Hadîce dahi müte‘âkıben vefât etmeleriyle verâseti mezbûr Mehmed Odabaşı’ya ve mezbûre Âişe’ye münhasıra ve tashîh-i meselesi bi-tarîkı’l-münâsahati’ş-şer‘iyye üç yüz altmış sehmden olup sihâm-ı mezbûreden iki yüz altmış beş sehmi mezbûre Âişe Odabaşı’ya ve doksan beş sehmi mezbûre Âişe’ye isâbeti tahakkukundan sonra mezbûre Âişe zâtı ba‘de’t-ta‘rîfi’ş-şer‘î meclis-i şer‘-i şerîf-i enverde bâ‘isü’l-kitâb mezbûr Mehmed Odabaşı mahzarında ikrâr ve takrîr-i kelâm edip işbu defterde zikr olunan eşyâ ve kırk bir fındık altını kızım müteveffât-ı mezbûrenin terekesindendir deyü tashîh-i mezkûr üzere hisse-i irsiyemi mezbûr Mehmed Odabaşı’dan taleb ve da‘vâ eylediğimde ol dahi cevâbında zikr olunan eşyâ ve altın benimdir demekle nizâ‘-ı küllî cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni mezbûr Mehmed Odabaşı ile on iki guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru mezbûr Mehmed Odabaşı yedinden tamâmen ahz u kabz eylediğimden sonra müteveffât-ı mezbûrûnun kalîl ü kesîr, celîl ü hakīr terekesine müte‘allıka âmme-i da‘vâdan her birimiz âharın zimmetini ibrâ ve ıskāt eyledik fîmâ-ba‘d birbirimiz ile kat‘an da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Muharrem sene 1153. Şuhûdü’l-hâl: Ahmed Çelebi b. Hasan, Mehmed Çelebi b. Abdullah, Salih b. Süleyman, Ali b. Abdullah