Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 207 Hüküm no: 181 Orijinal metin no: [25b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekbanlar odası nukud vakfına borcu olan Lefter ile mütevelli Mehmed Odabaşı arasındaki davaya sulh bedeli karşılığı son verildiği Sulh Dergâh-ı âlî -dâme mahfûfen bi’l-me‘âlî- yeniçerilerinden yirmi üç sekbanlar odasının nukūd-ı mevkūfesine bi’l-fi‘il mütevellî olan Mehmed Odabaşı b. Mustafa nâm kimesne meclis-i şer‘-i hatîr-ı lâzımü’t-tevkīrde bâ‘is-i hâze’s-sifr Lefter v. Yani zimmî muvâcehesinde bi’t-tevliye ikrâr ve takrîr-i kelâm edip mesfûr Lefter zimmetinde karz olmak üzere mâl-ı vakf-ı mezbûrdan iki yüz altmış guruş olmağla meblağ-ı mezbûru bi’t-tevliye taleb ve da‘vâya tasaddî eylediğimde mesfûr Lefter zimmî dahi meblağ-ı mezbûru bi’l-külliye inkâr eyledikde beynimizde münâza‘ât-ı kesîre ve muhâsamât-ı şedîde ve ekîde cereyân etmiş idi, el-hâletü hâzihi ben müdde‘âmı bir vechile isbâta kādir olmayıp merkūm zimmînin dahi yemîn etmek ihtimâli gālib olmağın beynimizde muslihûn tavassut edip da‘vâ-yı mezkûremden beni mezbûr Lefter zimmî yüz seksen guruş üzerine inşâ-i akd-i sulh eylediklerinde ben dahi nef‘an li’l-vakf sulh-ı mezkûru kabûl ve bedel-i sulh olan meblağ-ı mezbûr yüz seksen guruşu merkūm Lefter zimmî yedinden bi’t-tevliye tamâmen ahz u kabz edip mâ‘adâsına ve sâir târîh-i kitâba gelince âmme-i de‘âvî ve kâffe-i mutâlebâtdan mezbûr Lefter zimmînin zimmetini bi’t-tevliye ibrâ ve ıskāt eylediğimde ol dahi bedel-i sulh-ı mezkûra müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: el-Hâc Süleyman b. Ömer, Osman Beşe b. Mustafa, el-Hâc Hasan b. Mahmud, Mustafa Çelebi b. Hasan, Ahmed Çelebi b. Mehmed, Hüseyin b. Abdullah