Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 208 Hüküm no: 182 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi ve Sandıkçı Mehmed’in evlerini Mustafa Odabaşı’ya sattıkları Menzil mübâya‘ası Mahmiye-i İstanbul mahallâtından Kızıltaş mahallesinde sâkin el-Hâc Ali b. Mehmed ve Hacı Hasan mahallesinde sâkin İbrahim Çelebi b. Sandıkcı Mehmed nâm kimesneler meclis-i şer‘-i hatîr-ı lâzımü’t-tevkīrde işbu râfi‘ü’l-kitâb Mustafa Odabaşı b. Abdullah ve Halil Çelebi b. Mustafa nâm kimesneler mahzarında her biri ikrâr-ı tâm ve takrîr-i kelâm edip akd-i âti’z-zikrin sudûruna değin ber-vech-i iştirâki’s-seviyy yedimizde mülk ve hakkımız olup mahmiye-i mezbûrede Deniz Abdal mahallesinde vâki‘ bir tarafdan Duhancı Mehmed Çelebi mülk menzili ve bir tarafdan yirmi sekiz Said Efendi bahçesi ve bir tarafdan tarîk-i hâs ve bir tarafdan tarîk-i âm ile mahdûd ve hâriciyesinde fevkānî bir bâb oda ve bir sofa ve bir kenîf ve bir bi’r-i mâ ve dâhiliyesinde fevkānî iki bâb oda ve bir sofa ve tahtânî bir bâb oda ve bir sofa ve bir kenîf ve eşcâr-ı müsmire ve gayr-ı müsmireyi hâvî bir mikdâr bahçeyi müştemil mülk menzilimizi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve sarîh-i mer‘î ile işbu mezbûrân Mustafa Odabaşı ve Halil Çelebi’ye ber-vech-i iştirâki’s-seviyy üç yüz elli guruşa bey‘ ve temlîk ve teslîm eylediğimizde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr üç yüz elli guruşu müşteriyân-ı mezbûrân yedlerinden tamâmen ahz u kabz eyledik fîmâ-ba‘d menzil-i mahdûd-ı mezkûrda bizim alâka ve medhallerimiz kalmayıp müşteriyân-ı mezbûrân Mustafa Odabaşı ve Halil Çelebi’nin iştirâki’s-seviyy ile mülk-i müşterâları ve hakk-ı sarfları olmuşdur keyfe mâ yeşeân ve yehtârân mutasarrıfân olsunlar dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ba‘de’l-ışrîn min-Muharrem sene 1153. Şuhûdü’l-hâl: Yusuf Efendi b. Mehmed el-imâm, Hacı Mehmed Ağa b. Ramazan, el-Hâc Ahmed b. Mehmed, Süleyman Beşe b. Ahmed, İbrahim Çelebi b. Mehmed, İbrahim Çelebi b. Halil, el-Hâc Ahmed b. Ömer, Yunus Çelebi b. İshak