Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 209 Hüküm no: 183 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Mehmed’in Yusuf Beşe’ye olan borcunu ödediği İbrâyı ikrâr Mahmiye-i İstanbul’da Hızır Bey mahallesinde sâkin Yusuf Beşe b. el-Hâc Süleyman nâm kimesne meclis-i şer‘-i şerîf-i enverde bâ‘is-i hâze’l-vesîka Ömer b. Mehmed nâm kimesne mahzarında üzerine da‘vâ ve takrîr-i kelâm edip mezbûr Ömer zimmetinde cihet-i karz-ı şer‘îden elli guruş hakkım olmağla meblağ-ı mezbûru mezbûr Ömer’den taleb eylediğimde edâdan imtinâ‘ eder suâl olunup meblağ-ı mezbûru bana edâ ve teslîme mezbûr Ömer’e tenbîh olunmak murâdımdır dedikde gıbbe’s-suâl mezbûr Ömer cevâbında fi’l-vâki‘ müdde‘î-i mezbûra cihet-i mezkûreden elli guruş deyni olduğunu ikrâr lâkin târîh-i kitâb şehrinin beşinci günü mahmiye-i mezbûrede Odunkapısı hâricinde vâki‘ Bakkāl dükkânımda meblağ-ı mezbûru kendüye tamâmen def‘ ü teslîm edip husûs-ı mezkûra ve gayre müte‘allıka âmme-i da‘vâdan benim zimmetimi ibrâ-i âm ile ibrâ ve ıskāt eylediğinden sonra yine târîh-i kitâb şehrinin yirmi dördüncü günü hâlâ Ahî Çelebi Mahkemesi’nde hilâfeten müvellâ olan Mehmed Mekkî Efendi huzûrunda meblağ-ı mezbûru yedinden taleb ve da‘vâ ben dahi kendüye tamâmen edâ ve teslîm edip husûs-ı mezkûra ve gayre müte‘allıka âmme-i da‘vâdan benim zimmetimi ibrâ ve ıskāt eyledi deyü Mehmed b. Receb ve Ahmed b. Abdullah nâm kimesneler bi’l-muvâcehe vech-i şer‘î üzere isbât eylediğimde meblağ-ı mezbûr mutâlebesiyle merkūm Yusuf Beşe bi-gayr-ı vech-i şer‘î mu‘ârazadan men‘ olunup yedime işbu i‘lâmı verilmişdir deyü mazmûnu min-külli’l-vücûh def‘-i mezkûruna mutâbık bir kıt‘a nâib-i mûmâ-ileyhin hatmiyle mahtûm i‘lâm ibrâzıyla def‘ edicek müdde‘î-i mezbûr Yusuf Beşe kazıyye minvâl-i muharrer üzere olduğunu ikrâr ve i‘tirâf etmeğin mûcebiyle meblağ-ı mezbûr mutâlebesiyle müdde‘î-i mezbûr Yusuf Beşe bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm sene selâse ve hamsîn ve mi’e ve elf. Şuhûdü’l-hâl: Osman b. Mehmed, Hüseyin b. Hasan, Ahmed b. Hüseyin, Ahmed b. Şa‘bân, Solak Mustafa, el-Hâc Mehmed b. Mustafa, es-Seyyid Mustafa b. es-Seyyid Hasan