Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 209 Hüküm no: 184 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un evini Osman Efendi ve hanımı Hatice’ye sattığı Mübâya‘a-i menzil Mahmiye-i İstanbul’da Çıkrıkcı Kemâl mahallesinde sâkine Safiye bt. Abdullah b. Abdurrahman nâm hatun tarafından husûs-ı âti’l-beyânı ikrâra vekîl olduğu zâtını ma‘rifet-i şer‘iyye ile ârifân Süleyman Ağa b. İsmail ve İbrahim Çelebi b. Hüseyin nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Hasan Ağa b. Ahmed nâm kimesne meclis-i şer‘-i hatîr-ı lâzımü’t-tevkīrde fahrü’l-eimme bâ‘isü’l-kitâb Osman Efendi b. el-Hâc Ahmed Efendi nâm kimesne ile zevce-i menkûhası olup mu‘arrifân-ı mezbûrân ta‘rîfleriyle mu‘arrefe olan Hadîce bt. Abdullah nâm hatun mahzarlarında bi’l-vekâle ikrâr ve takrîr-i kelâm edip müvekkilem mezbûre Safiye Hatun akd-i âti’z-zikrin sudûruna değin yedinde mülk ve hakkı olup mahmiye-i mezbûrede Hasan Halîfe mahallesinde vâki‘ bir tarafdan müvekkilem mezbûrenin âhar mülkü ve bir tarafdan Mehmed Efendi nâm kimesne menzili ve bir tarafdan ba‘zan vakıf odaları ve ba‘zan es-Seyyid el-Hâc Hüseyin nâm kimesne menzili ve bir tarafdan tarîk-i âm ile mahdûd fevkānî iki bâb oda ve bir sofa ve dehliz ve tahtânî dört bâb oda ve bir hamam ma‘a câmekân odası ve bir mahzen ve bir su kuyusu ve mahtab ve kenîf ve bir mikdâr bahçeyi müştemil mülk menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Osman Efendi’ye ve zevcesi mezbûre Hadîce Hatun’a iştirâk-i seviyy üzere bin üç yüz doksan beş guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr bin üç yüz doksan beş guruşu müvekkilem merkūme Safiye Hatun mezbûr Osman Efendi ve mezbûre Hadîce Hatun yedlerinden tamâmen ahz u kabz edip ba‘de’l-yevm menzil-i mahdûd-ı mezkûrda kat‘an alâka ve medhalim kalmayıp mezbûr Osman Efendi ile mezbûre Hadîce Hatun’un mülk-i müşterâları ve hakk-ı sırfları olmuşdur keyfe mâ yeşeân ve yehtârân mutasarrıf olsunlar dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-Muharremi’l-harâm sene 1153. Şuhûdü’l-hâl: el-Hâc Ebubekir Odabaşı b. İsmail, Hâfız Molla Mustafa b. Mehmed, Molla Mehmed Said b. Ali Efendi, Hasan b. Ahmed, Abdullah b. İbrahim, Mehmed Odabaşı b. Ali, Süleyman Ağa b. İsmail, Yazıcı Molla Mustafa