Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 210 Hüküm no: 185 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vakfettiği evin Hüseyin Odabaşı’ya kiralandığı Îcâr, istîcâr Merhûme Şerife Âişe Hatun bt. es-Seyyid Mustafa nâm sâhibetü’l-hayrın vakfına ber-vech-i meşrût mütevellîye olup medîne-i Üsküdar mahallâtından Atîk Vâlide Sultan mahallesinde sâkine Şerife Hadîce Hatun bt. Mehmed b. Abdullah’ın sadrî kebîr oğlu ve tarafından husûs-ı âti’z-zikri ikrâra vekîli olduğu ber-nehc-i şer‘î sâbit olan Mustafa Çelebi b. Osman meclis-i şer‘-i hatîr-ı lâzımü’t-tevkīrde bâ‘isü’l-vesîka Hüseyin Odabaşı b. Ahmed nâm kimesne mahzarında bi’l-vekâle ikrâr ve takrîr-i kelâm edip bundan akdem vakf-ı mezbûrun ber-vech-i meşrûta mütevellîsi müteveffâ Abdurrahman Çelebi b. Ahmed Efendi hayâtında ve zamân-ı tevliyetinde vakf-ı mezbûrdan olup mahmiye-i İstanbul’da Kefeli mahallesinde vâki‘ ma‘lûmü’l-hudûd yüz elli zirâ‘ arsayı üzerine her ne binâ eder ise kendi mâlından mu‘accelesine mahsûb etmek üzere mezbûr Hüseyin Odabaşı’ya yüz doksan yedi guruş bedel-i makbûz mukābelesinde tevliyeti hasebiyle tefvîz ve teslîm ol dahi ba‘de’t-tefevvüz ve’l-kabûl arsa-i mezbûre üzerine vech-i muharrer üzere ebniye-i ma‘lûmeyi binâ ettiğinden sonra merkūm Abdurrahman Çelebi fevt olup vâlidem müvekkile-i mezbûre Şerife Hadîce müteveffâ-yı merkūmun yerine ber-vech-i meşrûta kıbel-i şer‘-i enverden mütevellîye nasb u ta‘yîn olunmağla menzil-i mezkûru mezbûr Hüseyin Odabaşı’ya beher şehr yirmi beş akçe icâre-i müeccele ile bi’t-tevliye îcâr ve teslîm ettikde ol dahi ber-vech-i meşrûh istîcâr ve tesellüm ve kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Muharremi’l-harâm sene 1153. Şuhûdü’l-hâl: Mehmed Çelebi b. Abdullah, Ahmed Çelebi b. Şa‘bân, el-Hâc Ahmed b. Ömer Çelebi, el-Hâc Mustafa Arabzâde, es-Seyyid Mustafa Ruhalı