Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 211 Hüküm no: 186 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali hür olduğundan Ahmed Efendi’nin azat etmesi gerektiği İsbât-ı hürriyet Sâbıkā rıkkıyetini mu‘terife ve ber-vech-i âtî kıbel-i şer‘den da‘vâya me’zûne olan orta boylu, kara kaşlı, kara gözlü, Müslimetü’l-millet Emine bt. Ali nâm hatun meclis-i şer‘-i hatîr-ı lâzımü’t-tevkīrde kendüye rakīkası olmak üzere vaz‘-ı yedi mütehakkık olan müderrisîn-i kirâm zevi’l-ihtirâmdan sâhib-i hâzihi’l-vesîka Ahmed Efendi b. el-merhûm Mehmed Emin Efendi b. Mehmed tarafından zikri âtî da‘vâda ve redd-i cevâba vekîl olduğu ber-nehc-i şer‘î sâbit ve sübût-ı vekâletine hükm-i şer‘î lâhık olan Mustafa Efendi b. Sunullah Efendi üzerine da‘vâ ve takrîr-i kelâm edip ben vilâyet-i Anadolu’da Ada kasabası ahâlîsinden olup bana ve ebeveynime kat‘an rık târî olmamış hürretü’l-asl iken müvekkil-i mûmâ-ileyh rakīkası olmak zu‘muyla bi-gayr-ı hakkın vaz‘-ı yed etmekle suâl olunup sebîlim tahliye ve müvekkil-i mûmâ-ileyhin kasr-ı yedine tenbîh olunmak matlûbumdur dedikde gıbbe’s-suâl vekîl-i mezbûr Mustafa Efendi cevâbında müvekkil-i mûmâ-ileyh Ahmed Efendi târîh-i vesîkadan iki sene mukaddem mevsûfe-i mezbûreyi medîne-i İzmir’de sâkin Mısırlı Halil Kapudan’dan Gürcü cinsinden olmak üzere iki yüz altmış guruş semen-i medfû‘a iştirâ etmiş idim deyü vaz‘-ı yedini ikrâr lâkin hürriyeti ma‘lûmum değildir deyü bi’l-vekâle inkâr edicek mevsûfe-i mezbûre Emine’den ber-vech-i muharrer hürriyetine beyyine taleb olundukda udûl-ı ahrâr-ı ricâl-i Müslimînden Ömer b. Mustafa ve Mehmed b. Ahmed ve Mustafa b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd işbu orta boylu, kara kaşlı, kara gözlü, Müslimetü’l-millet Emine bt. Ali vilâyet-i Anadolu’da Ada kasabası ahâlîsinden olup hürretü’l-asl olup mevsûfe-i mezbûreye ve ebeveynine kat‘an rık târî olmamış hürretü’l-asldır biz bu husûsa bu vech [üzere] şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûfe-i mezbûre Emine’nin hürriyetine ba‘de’l-hükm sebîli tahliye ve müvekkil-i mûmâ-ileyhin kasr-ı yed etmek üzere tenbîh birle mâ-vaka‘a bi’t-taleb ketb olundu. Fî 22 min-Muharremi’l-harâm sene 1153. Şuhûdü’l-hâl: Mehmed Ağa b. Ahmed, Mehmed Çelebi b. Abdullah, Rüstem Çelebi b. Abdullah, Halil Çelebi b. İbrahim, Mehmed Çelebi b. İbrahim