Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 212 Hüküm no: 187 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin varislerinin kendilerine kalan evi Hasan Ağa’ya sattıkları Mübâya‘a Vilâyet-i Rumeli’de medîne-i Filibe mahallâtından Câmi‘-i kebîr mahallesinde sâkin iken bundan akdem fevt olan Abdullah Efendi b. Ali Efendi b. Abdullah’ın verâseti zevce-i menkûha-i metrûkesi Afife bt. Ebubekir nâm hatun ile kebîr oğulları Abdülvahab Ağa ve Ebubekir Ağa’ya ve kebîre kızları Saliha ve Ümmühani hatunlara münhasıra ve mesele-i mîrâsları kırk sekiz sehmden olup sihâm-ı merkūmeden altı sehmi merkūme Afife Hatun’a ve on dörder sehmi mezbûrân Abdülvahab Ağa ve Ebubekir Ağa’dan her birine ve yedişer sehmi mezbûretân Saliha ve Ümmühani Hatun’dan her birine isâbeti tahakkukundan sonra mezbûrân Abdülvahab Ağa ve Ebubekir Ağa vâlideleri mezbûre Afife ve hemşîreleri mezbûretân Saliha ve Ümmühani hâzıralar olduğu halde meclis-i şer‘-i hatîr-ı lâzımü’t-tevkīrde Voynuk beyi demekle şehîr sâhibü’l-vesîka Hasan Ağa b. Hüseyin muvâcehesinde her biri ikrâr-ı tâm ve takrîr-i kelâm edip mahalle-i merkūmede vâki‘ bir tarafdan merkūm Hasan Ağa menzili ve üç tarafdan tarîk-i âm ile mahdûd hâriciyesinde yedi bâb oda ve üç sofa ve ahur ve anbâr ve iki bi’r-i mâ ve kenîf ve dâhiliyesinde yedi bâb oda ve iki sofa ve hamam ve soba ve matbah ve kilâr ve kenîf ve bi’r-i mâ ve hadîka ve havluyu müştemil mülk menzilin sülüsü vâlidemiz mezbûre Afife’nin ve sülüsânı mûrisimiz merkūm Abdullah Efendi’nin ile’l-vefât yedinde mülk ve hakkı olup ba‘de vefâtihî tashîh-i mezkûr üzere bizimle vâlidemiz mezbûre Afife’ye ve hemşîrelerimiz mezbûretân Saliha ve Ümmühani’ye bi’l-ırsi’ş-şer‘î isâbet ve intikāl etmeğin menzil-i mahdûd-ı mezkûrun mecmû‘unu alâ-mâ yeştemilühû ve yahvîhi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Hasan Ağa’ya beş yüz guruşa her birimiz bey‘ ve temlîk ve mahallinde zabt ve tasarrufa tarafımızdan taslît eylediğimizde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr beş yüz guruşu her birimiz bi-kadri’l-hısâs merkūm Hasan Ağa yedinden ahz u kabz eyledik ba‘de’l-yevm menzil-i mahdûd-ı mezkûrda bizim alâka ve medhalimiz kalmayıp merkūm Hasan Ağa’nın mülk-i müşterâsıdır keyfe mâ yeşâ ve yehtâr mutasarrıf olsun dediklerinde merkūm Hasan Ağa ve mezbûrât Afife ve Saliha ve Ümmühani mezbûrân Abdülvahab Ağa ve Ebubekir Ağa’yı cemî‘ takrîr-i meşrûhlarında tasdîk etmeleriyle mâ-vaka‘a bi’t-taleb ketb olundu. Fî 27 min-Muharrem sene 1153. Şuhûdü’l-hâl: Abdurrahim Bey b. Mehmed Efendi, İbrahim Ağa emîn-i kışlak, Şehrî İbrahim Ağa tâbi‘-i defterdâr, el-Hâc Yusuf Ağa b. Hüseyin, Osman Efendi hoca-i mekteb, Şehrî Memiş Ağa, Mehmed Ağa b. Ahmed, es-Seyyid Süleyman Filibeli