Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 213 Hüküm no: 188 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Ali’nin evini Süleyman Beşe’ye sattığı Mübâya‘a-i menzil Mahmiye-i İstanbul’da Hızır Bey mahallesinde sâkine zâtı bi’t-ta‘rîfi’ş-şer‘î ârifân Molla Ali b. Abdullah ve Hacı Hüseyin b. İsmail ta‘rîfleriyle mu‘arrefe olan İsmihan bt. Ali nâm hatun meclis-i şer‘-i hatîr-ı lâzımü’t-tevkīrde işbu bâ‘isü’l-kitâb Süleyman Beşe b. Ömer nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ iki tarafdan benim âhar mülk menzil ve bahçem ve bir tarafdan Hacı Mustafa zevcesi Âişe Hatun mülk menzili ve bir tarafdan tarîk-i âm ile mahdûd tabaka-i ulyâsında bir bâb ada ve bir sofa ve bir matbah ve bir kilâr ve tabaka-i vüstâda bir bâb oda ve bir sofa ve bir matbah ve bir kilâr ve bir kenîf ve süflâsında bir matbah ve bir bi’r-i mâyı müştemil mülk menzilimi zikr olunan ulyâ ve vustâda olan odaların benim âhar menzilim tarafındaki dolma duvarları beynimizde müşterek olmak üzere ve yine menzil-i âharım tarafında zikr olunan odaların binâsı müştemil olduğu tûlen üç zirâ‘ ve arzen bir tarafdan altı parmak ve bir tarafdan on sekiz parmak ki munassıfan on iki parmak bi-hesâb-ı terbî‘î bir buçuk zirâ‘ arsası benim ve havâsı müşteri-yi mezbûrun olmak üzere bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve sarîh-i mer‘î ile üç yüz seksen guruşa mezbûr Süleyman Beşe’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr üç yüz seksen guruşu müşteri-yi mezbûr Süleyman Beşe yedinden tamâmen ahz u kabz eyledim fîmâ-ba‘d menzil-i mahdûd-ı mezkûr müşteri-yi mezbûr Süleyman Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm sene 1153. Şuhûdü’l-hâl: Ahmed Efendi b. Mustafa el-imâm, Hacı Mehmed b. Ali, Hasan Beşe b. Ali, Ketenci Hasan Çelebi b. Abdullah, Mustafa b. Mehmed el-mu[h]zır, Ali b. Abdullah el-muhzır, Bosnavî Ahmed el-muhzır