Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 214 Hüküm no: 189 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şatırzade Mehmed Ağa’nın demir imalathanesini Abacı Ahmed’e sattığı Mübâya‘a-i samakov Fi’l-asl vilâyet-i Rumeli’de medîne-i Tatarpazarcığı mahallâtından Musli mahallesi ahâlîsinden olup mahmiye-i İstanbul’da Kaliçeciler Köşkü kurbünde Ali el-Fenârî mahallesinde müsâfiren sâkin Şatırzâde demekle ma‘rûf Mehmed Ağa b. Süleyman nâm kimesne meclis-i şer‘-i şerîf-i enverde işbu bâ‘isü’l-kitâb Abacı el-Hâc Ahmed b. Mehmed nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna dek yedimde mülk ve hakkım olup medîne-i mezbûreye tâbi‘ Poştere nâm karyede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât iki bâb mülk demir samakov ve beş bâb yenseri ve rodoşnalığımı cemî‘ tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr el-Hâc Ahmed’e üç bin beş yüz guruşa bey‘ ve temlîk ve mahallinde her birini zabt ve tasarrufa taslît eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr üç bin beş yüz guruşu mezbûr el-Hâc Ahmed yedinden tamâmen ahz u kabz eyledim ba‘de’l-yevm mârrü’z-zikr iki bâb samakovu ve beş bâb …? ve rodoşnalık mezbûr el-Hâc Ahmed’in mülk-i müşterâsı olup kat‘an benim alâka ve medhalim kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Muharrem sene 1153. Şuhûdü’l-hâl: Serdengeçdizâde Mustafa Ağa, es-Seyyid el-Hâc Mehmed b. es-Seyyid Hasan, es-Seyyid Mustafa b. es-Seyyid Hasan, Bayrakdâr Mustafa Ağa b. İsmail, Yakub Ağa b. Hacı Osman, Mehmed Beşe b. Mustafa, Mustafa Ağa b. İsmail, Ahmed Ağa b. Osman, Ömer Beşe b. Osman, Kurdzâde Mustafa Ağa b. Mehmed