Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 214 Hüküm no: 190 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kara Malak Ahmed Dayı’ya borcu olan Mehmed’in varislerden olan Halime’ye hakkını vermesi İsbât-ı verâset Fi’l-asl Malkara kazâsına tâbi‘ Soğutca nâm karye ahâlîsinden olup mahmiye-i İstanbul’da Sarrâc Doğan mahallesinde sâkine ve ber-vech-i âtî iddi‘â-i verâset eden bâ‘isetü’l-vesîka Halime bt. İbrahim nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde Mehmed b. Mustafa nâm kimesne muvâcehesinde üzerine da‘vâ ve takrîr-i kelâm edip fi’l-asl karye-i mezbûre ahâlîsinden olup vilâyet-i Rumeli’de Rodoscuk kasabasında ticâret vechi üzere mutavattın iken bundan akdem vefât eden tüccârdan Kara Malak Ahmed Dayı b. Mehmed b. Pehlivan Ahmed’in li-ebeveyn ammisi Bekci Ali’nin kızı Fâtıma’nın sadriye kızı olduğumdan mâ‘adâ müteveffâ-yı mezbûrun li-üm kız karındaşı Râbia’nın sadriye kızı diğer Fâtıma’nın sadriye kızı olmağla müteveffâ-yı mezbûrun verâseti kasaba-i mezbûrede sâkine zevcesi Fâtıma bt. Abdullah nâm hatun ile zî-rahm cihetinden bana ve kasaba-i merkūmede sâkin li-ebeveyn er karındaşım İbrahim’e münhasıradır bizlerden gayrı vârisi ve terekesine müstahıkk-ı âharı olmamağla müteveffâ-yı mezbûr Kara Malak Ahmed Dayı’nın merkūm Mehmed zimmetinde cihet-i karzdan yirmi bir guruş hakkından bâkī on guruşu kalmağla meblağ-ı bâkī-yi mezbûrdan hisse-i irsiyemi merkūm Mehmed’den taleb ederim suâl olunup edâya tenbîh olunması bi’l-verâse murâdımdır dedikde gıbbe’s-suâl merkūm Mehmed cevâbında müteveffâ-yı merkūma cihet-i merkūmeden zimmetinde ol mikdâr guruş deyni olduğunu ikrâr lâkin verâseti ma‘lûmum değildir deyü inkâr edicek müdde‘iye-i mezbûre Halime’den ber-vech-i muharrer verâsetine beyyine taleb olundukda udûl-ı ahrâr-ı ricâl-i Müslimînden ve karye-i mezbûre ahâlîsinden olup mahmiye-i merkūmede Sırmakeş mahallesi sükkânından Emrullah b. Ali ve İsmail b. Mahmud ve Sarrâc Doğan mahallesinde sâkin Ahmed Ağa b. Hacı Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-asl Malkara kazâsına tâbi‘ Soğutca nâm karye ahâlîsinden olup vilâyet-i Rumeli’de Rodoscuk kasabasında ticâret vechi üzere sâkin iken bundan akdem vefât eden tüccârdan Kara Malak Ahmed Dayı b. Mehmed b. Pehlivan Ahmed’in li-ebeveyn ammisi Bekci Ali’nin sulbiye kızı Fâtıma’nın işbu müdde‘iye Halime sadriye kızı ve müteveffâ-yı mezbûrun li-üm kız karındaşı Râbia’nın sadriye kızı diğer Fâtıma’nın kezâlik sadriye kızı olmağla müteveffâ-yı mezbûrun verâseti kasaba-i merkūmede sâkine zevcesi Fâtıma bt. Abdullah nâm hatun ile zî-rahm cihetinden müdde‘iye-i mezbûre Halime’ye ve mezbûrenin li-ebeveyn er karındaşı olup kasaba-i merkūmede sâkin İbrahim’e münhasıradır bunlardan gayrı vârisi ve terekesine müstahıkk-ı âhar olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 28 min-Muharremi’l-harâm sene 1153. Şuhûdü’l-hâl: Rüstem Beşe b. Mustafa, Halil b. İsmail, Mehmed b. Abdullah, Molla Hüseyin du‘âcı, Mehmed b. Eyüb