Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 216 Hüküm no: 192 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın vakfettiği evlerin tevliyetinin İmam Osman Ağa’ya verildiği Nasb-ı tevliyet Mahmiye-i İstanbul’da Davudpaşa mahallesi imâmı bâ‘is-i hâzihi’l-vesîka fahrü’l-eimmeti’l-kirâm el-Hâc Mustafa Efendi b. el-Hâc Mehmed Efendi meclis-i şer‘-i hatîr-ı lâzımü’t-tevkīrde takrîr-i kelâm ve tavzîh ani’l-merâm edip merhûm Osman Ağa b. Halil Paşa nâm sâhibü’l-hayrın mahalle-i mezbûrede vâki‘ binâ vakfeylediği ma‘lûmü’l-hudûd ve’l-müştemilât birbirine muttasıl olup altı bâb menâzilin tevliyetini evvelâ kendüye ba‘de vefâtihî zevcesi Âişe Hatun bt. Ahmed Efendi’ye ba‘dehâ evlâdına ve evlâd-ı evlâdına ve evlâd-ı evlâd-ı evlâdına ve ba‘de’l-inkırâz mahalle-i mezbûre imâmına şart ve ta‘yîn eylediği bin seksen yedi târîhiyle müverrah [ve] mümzâ ve mahtûm vakfiye-i ma‘mûlün-bihâsında mastûr ve mukayyed olmağla vakf-ı mezbûra evlâddan meşrûtiyet üzere mütevellîye olan Âişe Hatun vefât edip ve evlâd dahi bi’l-külliye munkariz olup nevbet-i tevliyet şart-ı vâkıf üzere benim olmağın işbu hâzırûn bi’l-meclis Müslimînden ba‘de’l-istihbâr kıbel-i şer‘den vakf-ı mezbûra mütevellî nasb u ta‘yîn olunup yedime li-ecli’s-sened vesîka i‘tâ olunmak matlûbumdur dedikde fi’l-vâki‘ hâl bâlâda tafsîl ü beyân ve şerh u ayân olunan vech üzere olduğunu mahalle-i merkūme ahâlîsinden zeyl-i vesîkada muharrerü’l-esâmî Müslimîn alâ-tarîkı’ş-şehâde ihbâr etmeleriyle mûcebince vakf-ı mezbûra ber-mûceb-i şart-ı vâkıf kıbel-i şer‘den imâm-ı merkūm el-Hâc Mustafa Efendi mütevellî nasb u ta‘yîn olundukda ol dahi tevliyet-i merkūmeyi kabûl ve hıdemât-ı lâzımesini edâya ta‘ahhüd etmeğin işbu vesîka-i enîka bi’t-taleb ketb olundu. Fî 27 min-Muharrem sene 1153. Şuhûdü’l-hâl: İbrahim Efendi b. Hacı Mehmed, Hâfız Mehmed Efendi b. İbrahim, Mehmed Efendi b. Hasan, Molla Mehmed b. Hacı Halil, İbrahim Çelebi b. Halil, Molla Mehmed b. Ahmed Efendi, Süleyman Ağa b. İbrahim, Ahmed Çelebi b. Şa‘bân, Molla Hüseyin du‘âcı