Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 217 Hüküm no: 193 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samol v. Simyon’u öldüren Ligos hakkında gereğinin yapılması için maktulün yakınları gelene kadar hapsedilmesi İsbât-ı katl Fi’l-asl vilâyet-i Anadolu’da Ürgüb kazâsına tâbi‘ Zeli [Zalela] nâm karye ahâlîsinden olup mahmiye-i İstanbul’da Avcıbey mahallesinde vâki‘ Yağhâne’de mütemekkin iken bundan akdem hâlik olan Samol v. Simyon v. Korba nâm zimmînin verâseti zevce-i menkûha-i metrûkesi Agafile bt. Yorgi ve anası Gülistan bt. Loka nâm Nasrâniyeler ile min-ciheti’l-usûbeti’n-nesebiye ammisi oğulları Agasti v. Mihal ve Lanbolos v. Nikola nâm zimmîlere münhasıra olduğu lede’ş-şer‘i’l-enver mahzar-ı hasm-ı câhidde sâbit ve müstahık oldukdan sonra bâ‘iseyü’r-rakīm mezbûrân Agasti ve Lanbolos zimmîler meclis-i şer‘-i hatîr-ı lâzımü’t-tevkīrde Ligos v. Yorgi nâm zimmî muvâcehesinde her biri bi’l-verâse üzerine da‘vâ ve takrîr-i kelâm edip mesfûr Ligor mûrisimiz hâlik-i mersûm Samol ile zikri sebk eden Yağhâne’de mütemekkinler iken târîh-i kitâbdan beş gün mukaddem Pazarertesi gecesi sâ‘at ikide iken mesfûr Ligor âlet-i cârihadan beyâz kabzalı bıçak ile bi-gayr-ı hakkın mûrisimiz mersûm Samol v. Simyon v. Korba’yı sol omuzu küreğinden darb ve cerh ve katl eylediğinden sonra mesfûr Ligor mahzar-ı şuhûdda mûrisimiz mersûm Samol v. Simyon v. Korba’yı ben darb ve cerh ve katl eyledim deyü kirâren ve mirâren ikrâr ve i‘tirâf dahi etmekle mûcib-i şer‘îsini mesfûr Ligor’dan bi’l-verâse taleb ederiz dediklerinde gıbbe’s-suâl ve akībe’l-inkâr müdde‘iyân-ı mezbûrândan ber-vech-i muharrer müdde‘âlarına beyyine taleb olundukda udûl-ı millet-i Nasârâdan mahmiye-i merkūmede Ayvansaray kapısı kurbünde Mustafa Paşa-i atîk mahallesi mütemekkinlerinden Yovan v. Yorgi ve Kiryako v. Kostantidi nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu Ligor târîh-i kitâbdan beş gün mukaddem Pazarertesi gecesi sâ‘at ikide iken müdde‘iyân-ı mezbûrânın mûrisleri Samol v. Simyon v. Korba’yı ben darb ve cerh ve katl eyledim deyü bizim huzûrumuzda kirâren ve mirâren ikrâr ve i‘tirâf eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde şâhidân-ı mezbûrân mahalleleri ahâlîsinden sırran ve alenen tezkiye olunduklarında her biri makbûlü’ş-şehâde oldukları müte‘ayyen oldukdan sonra hâlik-i mesfûrun zevcesi ve anası mesfûretân Agafile ve Gülistan Nasrâniyeler mesbûku’z-zikr Zeli karyesinde mütemekkineler olup mûcib-i şer‘îsini istîfâda mesfûretânın şer‘an huzûrları lâzım olmağın mesfûretân Âsitâne-i sa‘âdete gelinceye değin mûcib-i şer‘îsi tevkīf ve mesfûr Ligor habs olunmak üzere tenbîh birle mâ-vaka‘a bi’t-taleb ketb olundu. Fî 24 min-Muharremi’l-harâm sene 1153. Şuhûdü’l-hâl: es-Seyyid Mustafa b. es-Seyyid Hasan Ruhalı, Arabzâde el-Hâc Mustafa b. Hacı Mehmed, Du‘âcı Molla Hüseyin b. Hacı Mehmed, es-Seyyid Ali b. es-Seyyid Mustafa