Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 218 Hüküm no: 194 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vakfettiği evin, mütevellisi tarafından Ebubekir’e kiralandığı Îcâr ve istîcâr Merhûme Şerife Âişe Hatun bt. es-Seyyid Mustafa Efendi nâm sâhibetü’l-hayrın vakfına ber-vech-i meşrûta mütevellîye olup medîne-i Üsküdar mahallâtından Atîk Vâlide Sultan mahallesinde sâkine Şerife Hadîce Hatun bt. Mehmed b. Abdullah’ın sadrî kebîr oğlu ve tarafından husûs-ı âti’z-zikri ikrâra vekîl olduğu ber-nehc-i şer‘î sâbit olan Mustafa Çelebi b. Osman nâm kimesne meclis-i şer‘-i şerîf-i enverde bâ‘isü’l-vesîka Hâfız el-Hâc Ebubekir b. Hasan nâm kimesne muvâcehesinde bi’l-vekâle ikrâr-ı tâm ve takrîr-i kelâm edip bundan akdem vakf-ı mezbûra ber-vech-i meşrûta mütevellî olan müteveffâ Abdurrahman Çelebi b. Ahmed Efendi hayâtında ve zamân-ı tevliyetinde vakf-ı mezbûrdan olup mahmiye-i İstanbul’da Kefeli mahallesinde vâki‘ ma‘lûmü’l-hudûd iki yüz zirâ‘ arsayı üzerine her ne binâ eder ise kendi mâlından mu‘accelesine mahsûben etmek üzere mezbûr Hâfız el-Hâc Ebubekir’e tevliyeti hasebiyle bedel-i ma‘lûm ve makbûz mukābelesinde tefvîz ve teslîm ettikde ol dahi ba‘de’t-tefevvüz ve’l-kabûl arsa-i mezbûre üzerine vech-i muharrer üzere kendi mâlından ebniye-i ma‘lûmeyi binâ ettikden sonra mütevellî-yi merkūm Abdurrahman Çelebi fevt olup müteveffâ-yı merkūmun yerine vâlidem müvekkile-i mezbûre Şerife Hadîce kıbel-i şer‘-i enverden ber-vech-i meşrûta mütevellîye nasb u ta‘yîn olunmağla menzil-i mezkûru beher şehr yirmi beşer akçe icâre-i müeccele ile bi’t-tevliye mezbûr Hâfız el-Hâc Ebubekir’e îcâr ve teslîm ettikde ol dahi ber-vech-i meşrûh istîcâr ve tesellüm ve kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Muharremi’l-harâm sene 1153. Şuhûdü’l-hâl: Mehmed Ağa b. Abdullah, Ahmed Çelebi b. Şa‘bân, el-Hâc Ahmed b. Ömer, el-Hâc Mustafa Arabzâde, es-Seyyid Mustafa Ruhalı