Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 219 Hüküm no: 195 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamile olan Ayşe’ye nafaka takdiri Nafaka-i haml Mahmiye-i İstanbul’da Kumkapı kurbünde Tavâşî Süleyman Ağa mahallesinde sâkine ve zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Âişe bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i sâbıkı el-Hâc Hasan b. Abdullah nâm kimesne mahzarında takrîr-i kelâm ve ta‘bîr ani’l-merâm edip mezbûr el-Hâc Hasan ile zevciyet beynimizde kāime iken mezbûrun firâşından nâşî hamlim zuhûr etmekle vaz‘-ı haml ile iddetim münkazıye oluncaya değin mezbûr el-Hâc Hasan üzerine kıbel-i şer‘-i enverden kadr-ı kifâye nafaka farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ-lehû ve hüsnü-meâb efendi hazretleri dahi mezbûre Âişe Hatun’un vaz‘-ı haml ile iddeti münkazıye oluncaya değin mezbûr el-Hâc Hasan üzerine târîh-i kitâbdan bi’t-terâzi yevmî ikişer para farz ve takdîr edip meblağ-ı mefrûz-ı mezkûr ikişer parayı kendi havâyic-i lâzımesine harc ü sarfa ve lede’l-iktizâ istidâneye ve inde’z-zafer mezbûr el-Hâc Hasan üzerine rücû‘a mezbûre Âişe Hatun’a izin vermeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Muharrem sene 1153. Şuhûdü’l-hâl: el-Hâc Mustafa b. Hacı Mehmed muhzır, Boşnak Ahmed b. Şa‘bân, es-Seyyid Mustafa Ruhalı, Muhzır Ali b. Abdullah, Molla Hüseyin du‘âcı