Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 219 Hüküm no: 196 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Ağa’ya borcu olan Salih’in borcunu varisi Ömer’e ödediği İsbât-ı verâset Fi’l-asl medîne-i Tokat mahallâtından Soğukpınar mahallesi ahâlîsinden olup medîne-i Kütahya’da Büyük Sincanlı’da müsâfiren sâkin iken bundan akdem katîlen fevt olan Ali Ağa b. Mehmed b. Osman’ın li-ebeveyn karındaşı ve hasren vârisi olduğunu iddi‘â eden bâ‘isü’l-kitâb Ömer nâm kimesne meclis-i şer‘-i hatîr-ı lâzımü’t-tevkīrde Salih b. Ahmed nâm kimesne mahzarında üzerine da‘vâ ve takrîr-i kelâm edip ben müteveffâ-yı mezbûrun li-ebeveyn karındaşı olup babamız ismi mezbûr Mehmed ve dedemiz ismi Osman ve vâlidemiz ismi Emine bt. Ali ve maskat-ı re’simiz mahalle-i mezbûre olup verâseti bana münhasıradır gayrı vârisi ve terekesine müstahıkk-ı âhar olmamağla müteveffâ-yı mezbûrun mezbûr Salih zimmetinde cihet-i deyn-i şer‘îden on guruş hakkı olmağla kable’l-ahz fevt oldukda meblağ-ı mezbûru taleb eylerim suâl olunsun dedikde gıbbe’s-suâl Salih cevâbında fi’l-hakīka müteveffâ-yı mezbûra on guruş deyni olduğunu ikrâr mâ‘adâyı inkâr edicek müdde‘î-i merkūmdan ber-vech-i muharrer müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden ve mârrü’z-zikr Tokat ahâlîsinden olup mahmiye-i İstanbul’da Destereciler kurbünde handa müsâfiren sâkin es-Seyyid Abdülahad b. eş-Şeyh es-Seyyid İbrahim ve Üsküdar’da Vâlide-i atîk kurbünde kezâlik müsâfiren sâkin Salih Sipâhi b. İbrahim nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu müdde‘î-i mezbûr Ömer bundan akdem Kütahya’da katîlen fevt olan Ali Ağa ile li-ebeveyn karındaşlar olup babaları ismi Mehmed ve dedeleri ismi Osman [28a] ve vâlideleri ismi Emine bt. Ali ve maskat-ı re’sleri mahalle-i mezbûre olup müteveffâ-yı mezbûrun verâseti müdde‘î mezbûr Ömer’e münhasıradır, gayrı vârisi ve terekesine müstahıkk-ı âhar olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mezbûr Ömer meclis-i şer‘de merkūm Salih muvâcehesinde ikrâr ve takrîr-i kelâm edip ânifen edâsına tenbîh olunan meblağ-ı mezbûr on guruşu mezbûr Salih yedinden tamâmen ahz u kabz eyledim dedikde mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: es-Seyyid Mustafa b. Hasan, Hüseyin Çelebi du‘âcı, Mehmed b. Osman, Mehmed b. Ali