Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 220 Hüküm no: 197 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Ahmed’in eşi Mustafa’dan muhâlaa yoluyla boşandığı Muhâla‘a Mahmiye-i İstanbul’da Molla Hüsrev mahallesinde sâkine ve zâtı ta‘rîf-i şer‘î ile mu‘arrefe olan Havva bt. Ahmed nâm hatun meclis-i şer‘-i hatîr-ı lâzımü’t-tevkīrde zevc-i dâhili bâ‘is-i hâze’l-kitâb Mustafa b. Hüseyin mahzarında ikrâr-ı tâm ve takrîr-i kelâm edip mezbûr Mustafa zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan iki bin dört yüz akçe mehr-i müeccelimden bin iki yüz akçesini mezbûr Mustafa meclis-i şer‘de bana def‘ ü teslîm ben dahi yedinden ba‘de’l-ahz ve’l-kabz bâkī bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm sene 1153. Şuhûdü’l-hâl: Solak Mustafa muhzır, Üsküdarî Ali muhzır, el-Hâc Ahmed b. Ömer, Ali b. Abdullah, Süleyman b. Ahmed, el-Hâc Mustafa b. Hacı Mehmed, Muhzır Ali b. Mustafa, Abdullah b. Hasan