Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 221 Hüküm no: 198 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ümmügülsüm Hatun’un kızı Hatice’ye nafaka takdiri Nafaka Mahmiye-i İstanbul’da Molla Hüsrev mahallesinde sâkine iken bundan akdem vefât eden Ümmügülsüm Hatun bt. el-Hâc Hasan b. Abdullah’ın sadriye kızı Hadîce nâm sagīrenin min-kıbeli’l-ebb ceddesi ve hâdinesi olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Âişe bt. el-Hâc Hüseyin nâm hatun meclis-i şer‘-i hatîr-ı lâzımü’t-tevkīrde sagīre-i mezbûrenin babası ve tesviye-i umûruna kıbel-i şer‘den mansûb vasîsi el-Hâc Mehmed b. Abdullah nâm kimesne muvâcehesinde bi’l-hıdâne takrîr-i kelâm edip sagīre-i mezbûre Hadîce’nin nafaka ve kisveye eşedd-i ihtiyâcı olmağla nafaka ve kisve ve sâir havâyic-i zarûriyesi’çün vasiyy-i mezbûrun makbûzu olan anası müteveffiye-i merkūma müntakil mâl-ı mevrûsesinden kıbel-i şer‘den kadr-ı kifâye nafaka ve kisve-bahâ farz ve takdîr olunmak bi’l-hıdâne matlûbumdur dedikde gıbbe’t-tasdîkış-şer‘î hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ-lehû ve hüsnü-meâb hazretleri dahi sagīre-i mezbûre Hadîce’nin nafaka ve kisve ve sâir havâyic-i zarûriyesi’çün anası müteveffiye-i mezbûreden müntakil mâl-ı mevrûsesinden târîh-i vesîkadan küllü yevm onar akçe farz ve takdîr buyurup meblağ-ı mefrûz-ı mezkûr onar akçeyi sagīre-i mezbûrenin nafaka ve kisve ve sâir havâyic-i zarûreriyesine harc ü sarfa ve lede’l-iktizâ istidâneye ve inde’z-zafer anası müteveffiye-i mezbûreden müntakil mâl-ı mevrûsuna rücû‘a merkūme Âişe Hatun’a izin birle mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharrem sene 1153. Şuhûdü’l-hâl: Feyzullah Efendi b. Mehmed, el-Hâc Ömer b. Yunus, Muhzır Mustafa b. Mehmed, İsmail Yazıcı b. Abdullah, Tahtacı Mehmed Çelebi b. Abdullah, Hüseyin Ağa b. Hasan, Ali Çelebi b. Abdullah