Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 222 Hüküm no: 200 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdurrahman’ın kızı Hanife’ye nafaka takdiri Nafaka Mahmiye-i İstanbul’da Nişancı Paşa mahallesinde sâkine olup zâtı ta‘rîf-i şer‘î ile mu‘arrefe olan bâ‘isetü’l-kitâb Zeyneb bt. Abdurrahman nâm hatun meclis-i şer‘-i hatîr-ı lâzımü’t-tevkīrde zevc-i mutallıkı Ahmed b. Maksud nâm kimesne mahzarında takrîr-i kelâm ve ta‘bîr ani’l-merâm edip mezbûrun firâşından hâsıl ve benden mütevellide işbu sagīre kızım Hanife’nin mâlı olmayıp nafaka ve kisveye ihtiyâcı olmağla kıbel-i şer‘den babası mezbûr Ahmed üzerine kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisvesi’çün babası mezbûr Ahmed üzerine târîh-i kitâbdan bi’t-terâzi yevmî dört akçe farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer merkūm Ahmed üzerine rücû‘a mezbûre Zeyneb Hatun’a izin vermeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm sene 1153. Şuhûdü’l-hâl: Mehmed Çelebi b. Abdullah, es-Seyyid Mustafa b. es-Seyyid Hasan, el-Hâc Mustafa Arabzâde