Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 223 Hüküm no: 201 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un eşi Musli’den muhâlaa yoluyla boşandığı Muhâla‘a Mahmiye-i İstanbul’da Acıçeşme kurbünde Hammâmî Muhyiddin mahallesinde sâkine ve zâtı bi’t-ta‘rîfi’ş-şer‘î ârifân Ali b. Abdullah ve Süleyman b. Ahmed nâm kimesneler ta‘rîfleriyle mu‘arrefe olan Fâtıma bt. Mustafa nâm hatun meclis-i şer‘-i hatîr-ı lâzımü’t-tevkīrde zevc-i dâhili işbu râfi‘ü’l-kitâb Musli b. Mustafa nâm kimesne mahzarında ikrâr ve takrîr-i kelâm edip işbu zevcim mezbûr Musli ile beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan bin altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl ibtidâ-i zevciyetden târîh-i kitâba gelince hukūk-ı zevciyet ve sâir beynimizde câriye âmme-i ahz u i‘tâya müte‘allıka âmme-i de‘âvîden her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi selhi Muharremi’l-harâm sene 1153. Şuhûdü’l-hâl: es-Seyyid Mustafa b. es-Seyyid Hasan, Süleyman b. Ahmed, Ali b. Abdullah, Halil b. Osman, Acem Ali b. Abdullah