Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 223 Hüküm no: 202 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin evdeki yarı hissesini kardeşi Ahmed Çelebi’ye sattığı Mübâya‘a Mahmiye-i İstanbul’da el-Hâc Evliyâ mahallesinde sâkin Hasan Çelebi b. Mehmed nâm kimesne meclis-i şer‘-i hatîr-ı lâzımü’t-tevkīrde li-ebeveyn er karındaşı bâ‘is-i hâze’l-kitâb Ahmed Çelebi mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Ali Çavuş mülkü ve bir tarafdan Arnavud Hüseyin mülkü ve bir tarafdan Mehmed mülkü ve bir tarafdan tarîk-i hâs ile mahdûd fevkānî bir bâb oda ve tahtânî iki bâb oda ve bir sofa ve bir bi’r-i mâ ve kenîf ve eşcâr-ı müsmire ve gayr-ı müsmireli bahçeyi müştemil mülk menzilin nısf-ı şâyi‘i karındaşım mezbûr Ahmed Çelebi’nin ve nısf-ı şâyi‘-i âharı akd-i âti’z-zikrin sudûruna değin yedimde mülk ve hakkım olmağla zikr olunan nısf-ı şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yetmiş beş guruşa karındaşım mezbûr Ahmed Çelebi’ye bey‘ ve temlîk eylediğimde ol dahi ber-vech-i muharrer iştirâ ve temellük ve kabûl edip semeni olan meblağ-ı mezbûr yetmiş beş guruşu mezbûr Ahmed Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda kat‘an benim alâka ve medhalim kalmayıp mecmû‘u karındaşım mezbûr Ahmed Çelebi’nin alâ mâ yeştemilühû ve yahvîhi mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: İbrahim Beşe b. Hüseyin, Mustafa Beşe b. Ömer, es-Seyyid Ahmed b. es-Seyyid İbrahim, Hüseyin Beşe b. Hüseyin, Ahmed Beşe b. Hüseyin, Kethüdâ el-Hâc Ahmed b. Ali yorganî, Hurmacı Abdullah Ağa, Ali Usta b. Mehmed, Molla Ahmed b. Hüseyin