Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 224 Hüküm no: 203 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe ve Hatice’nin Ali b. Mehmed’de olan alacağı ve sâir işleri için kardeşleri Abdullah Beşe’yi vekil tayin ettikleri Verâsete vekâlet Mora cezîresinde medîne-i Anabolu sâkinelerinden Âişe ve Hadîce bintey Ömer b. Abdurrahman nâm hatunlar taraflarından ber-vech-i âtî vekâlet iddi‘â eden li-ebeveyn er karındaşları Abdullah Beşe ibni’l-mezbûr Ömer nâm kimesne meclis-i şer‘-i hatîr-ı lâzımü’t-tevkīrde Ali b. Mehmed nâm kimesne mahzarında üzerine da‘vâ ve takrîr-i kelâm edip kız karındaşları müvekkiletân-ı mezbûretân Âişe ve Hadîce İstanbul’da Molla Ahî Vakfı’ndan olup Cibali kapısı dâhilinde Südcü odalarında vâki‘ ma‘lûmü’l-hudûd ve’l-müştemilât bir bâb vakıf menzilden altı sehm i‘tibâriyle birer sehm hisselerini bedel-i misli ve ma‘rifet-i mütevellî ile âhara ferâğa ve sâir zimem-i nâsda olan hukūklarını taleb ve da‘vâya ve ahz u kabza ve kendilere îsâle ve bunlar mütevakkıf olduğu umûrun küllîsinde taraflarından beni vekîl ve nâib-i menâb nasb u ta‘yîn etmeleriyle ben dahi vekâlet-i mezkûreyi kabûl eylediğime binâen müvekkiletân-ı mezbûretânın merkūm Ali zimmetinde cihet-i deyn-i şer‘îden on guruş hakları olmağla bi’l-vekâle taleb ederim suâl olunsun dedikde gıbbe’s-suâl mezbûr Ali cevâbında deyn-i mezkûru ikrâr lâkin müdde‘î-i mezbûrun ber-vech-i muharrer vekâletini inkâr edicek müdde‘î-i mezbûrdan vech-i meşrûh üzere vekâletine beyyine taleb olundukda udûl-ı ahrâr-ı ricâl-i Müslimînden ve mârrü’z-zikr medîne-i mezbûr ahâlîsinden olup mahmiye-i İstanbul’da Dergâh-ı âlî yeniçerileri odalarından yirmi ikinci bölük odasında misâfiren sâkin Mustafa Odabaşı b. Mehmed ve Pala Mehmed b. el-Hâc Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka medîne-i Anabolu sâkinelerinden Âişe ve Hadîce bintey Ömer b. Abdurrahman nâm hatunlar İstanbul’da Molla Ahî Vakfı’ndan olup Cibali kapısı dâhilinde südcü odalarında vâki‘ ma‘lûmü’l-hudûd ve’l-müştemilât bir bâb vakıf menzilden altı sehm i‘tibâriyle birer sehm hisselerini bedel-i misli ve ma‘rifet-i mütevellî ile âhara ferâğa ve sâir zimem-i nâsda olan hukūklarını taleb ve da‘vâ ve ahz u kabza ve kendilere îsâle ve bunlar mütevakkıf olduğu umûrun küllîsine taraflarından karındaşları işbu müdde‘î-i mezbûr Abdullah Beşe’yi vekîl ve nâib-i menâb nasb u ta‘yîn eylediklerinde ol dahi vekâlet-i mezkûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mezbûr Abdullah Beşe meclis-i şer‘de merkūm Ali muvâcehesinde ânifen edâsında tenbîh olunan meblağ-ı mezbûr on guruşu merkūm Ali yedinden tamâmen ahz u kabz eyledim dedikde mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Solak Mustafa Çelebi b. el-Hâc Mehmed, Ahmed Çelebi b. Şa‘bân, Hasan b. Mehmed, el-Hâc Mustafa b. Hacı Mehmed, es-Seyyid Mustafa b. Hüseyin