Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 225 Hüküm no: 204 Orijinal metin no: [28b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meyrem bt. Avakin ve Haçador v. Agya’nın horasancı dükkânında bulunan aletlerdeki haklarını Asvador’a sattıkları (bey’ bi’l-vefâ) Mübâya‘a Medîne-i Üsküdar’da Selami Efendi mahallesinde mütemekkin kendiden asîl ve zevcesi olup şahsını ma‘rifet-i şer‘iyye ile ârifân Serkiz v. Bağvan ve Karabet v. Agob nâm zimmîler ta‘rîfleriyle mu‘arrefe Meyrem b. Avakin v. Beryam nâm Nasrâniye tarafından husûs-ı âti’l-beyânda ikrâra vekîl olduğu sâbit olan bâ‘isü’s-sifr Haçador v. Agya nâm zimmî meclis-i şer‘-i şerîf-i enverde Asvadar v. Kasber nâm zimmî muvâcehesinde asâleten ve vekâleten ikrâr ve takrîr-i kelâm edip işbu yedimde olup medîne-i mezbûrede mukaddemâ nâibü’ş-şer‘ olan Mehmed Efendi ve Receb Efendi imzâlarıyla mümzâ ve mahtûm iki kıt‘a hüccet-i şer‘iyyede tasrîh ve beyân olunduğu vech üzere yedimizde mülk ve hakkımız olup medîne-i mezbûrede Süleyman Ağa mahallesinde vâki‘ bir tarafdan Horunlu? el-Hâc Ahmed menzili ve bir tarafdan Südcü el-Hâc İbrahim menzili ve bir tarafdan Pilavoğlu Mustafa menzili ve bir tarafdan tarîk-i âm ile mahdûd horasancı dükkânında mevcûd horasan taşında ve beynimizde ma‘lûm sâir âlât-ı lâzımesinde olan yedişer sehmden cem‘an on dört sehm hisse-i şâyi‘a-i memlûkemizi tarafeynden îcâb ve kabûlü hâvî bey‘-i bi’l-vefâ tarîkı üzere bir sene tamâmına değin merkūm Haçador zimmîye üç yüz otuz altı guruşa bey‘ eylediğimizde ol dahi ber-vech-i muharrer iştirâ ve kabûl eylediğinden sonra meblağ-ı mezbûr üç yüz altı guruşu merkūm Haçador zimmî yedinden bi’l-münâsafe tamâmen ahz u kabz eyledik dedikde mukırr-ı mezbûr Haçador zimmîyi kelimât-ı meşrûhasında merkūm Asvador zimmî vicâhen tahkīk ve şifâhen tasdîk etmeğin mâ-vaka‘a bi’t-taleb [29a] ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: el-Hâc Mustafa b. el-Hâc Mehmed, Ali Çelebi b. Abdullah, Mehmed Çelebi b. Abdullah, Mustafa b. Şa‘bân, Dursun v. Barsık, Artin v. Mikail, Donik v. Markar, Eknados v. Mogas