Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 226 Hüküm no: 205 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palasa ve babası Yorgi arasındaki eşya ve ev hissesi konusundaki davaya sulh bedeli karşılığı son verildiği Sulh Mahmiye-i İstanbul’da Mirâhur mahallesinde mütemekkine Palasa bt. Yorgi v. Anastaş nâm Nasrâniye tarafından husûs-ı âti’z-zikre vekîl olduğu şahsını bi’l-ma‘rifeti’ş-şer‘iyye ârifân Serkiz v. Parsam ve Yanaki v. Lütfi nâm zimmîler şehâdetleriyle sâbit ve sübût-ı vekâletine hükm-i şer‘î lâhık olan Yoseb v. Simyon nâm zimmî meclis-i şer‘-i hatîr-ı lâzımü’t-tevkīrde müvekkile-i mezbûrenin babası bâ‘is-i hâze’r-rakīm merkūm Yorgi zimmî muvâcehesinde bi’l-vekâle ikrâr ve takrîr-i kelâm edip bundan akdem müvekkile-i mezbûrenin mâlı olmak üzere bi’l-vekâle merkūm Yorgi zimmîden taleb ve da‘vâ sadedinde olduğum yirmi yedi zer-i mahbûb ve ber-mûceb-i defter-i müfredât eşyâ-i ma‘lûme ve Sultan Bayezid Hân-ı Veli Vakfı’ndan mahalle-i mezbûrede lede’l-ahâlî ma‘lûmü’l-hudûd ve’l-müştemilât vakıf menzilin rub‘ hisse menzili tavassut-ı muslihîn ile vekâlet-i mahkiyem hasebiyle doksan guruş bedel-i makbûza merkūm Yorgi zimmî ile sulh olup husûs-ı mezkûra ve târîh-i kitâba gelince sâir kalîl ü kesîr, celîl ü hakīr âmme-i de‘âvî ve muhâsamât ve kâffe-i mutâlebât ve eymândan bi’l-vekâle merkūm Yorgi zimmînin zimmetini ibrâ-i âmm-ı katı‘u’n-nizâ‘la ibrâ ve ıskāt eylediğimde ol dahi ibrâ-i mezkûru ba‘de’l-kabûl bedel-i sulh-ı mezbûr doksan guruşa ve târîh-i kitâba gelince sâir kalîl ü kesîr, celîl ü hakīr âmme-i de‘âvî ve muhâsamât ve kâffe-i mutâlebât ve eymândan müvekkilem merkūme Palasa Nasrâniye’nin zimmetini ibrâ-i âmm-ı katı‘u’n-nizâ‘la ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Mehmed Ağa b. Abdullah, Hüseyin Çelebi [b.] el-Hâc Mehmed, Mustafa Çelebi b. el-Hâ[c] Mehmed, Mehmed Ağa b. Ahmed, Seyyid Mustafa b. es-Seyyid Hasan Ruhalı