Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 228 Hüküm no: 207 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Hasan Ağa Vakfı’na ait odaların gelirinin Zeyneb ve Hatice arasında paylaşıldığı Hüccet-i ibrâ Ashâb-ı hayrâtdan merhûm Mehmed Çelebi b. Hasan Ağa’nın evlâdından mahmiye-i İstanbul’da Altımermer mahallesinde sâkine ve zâtı ta‘rîf-i şer‘î ile mu‘arrefe olan Zeyneb Hatun bt. Hasan Efendi meclis-i şer‘-i hatîr-ı lâzımü’t-tevkīrde vâkıf-ı mezbûrun Molla Şeref mahallesinde vâki‘ vakfeylediği yirmi bir bâb ma‘lûmü’l-hudûd ve’l-müştemilât müteehhilîn odalarına evlâdiyet ve meşrûtiyet üzere mütevellîye olup mezbûre Zeyneb Hatun’un li-ebeveyn kız karındaşı olan râfi‘atü hâze’l-kitâb Hadîce Hatun binti’l-mezbûr Hasan Efendi mahzarında ikrâr-ı tâm ve takrîr-i kelâm edip ceddimiz vâkıf-ı mûmâ-ileyh evkāfının gallesini evvelâ kendi nefsine ba‘dehû evlâdına ve evlâd-ı evlâdına ve evlâd-ı evlâd-ı evlâdına zükûr ve inâsına batnen ba‘de batnin ale’s-seviye şart edip ve vakf-ı mezkûrun tevliyetini dahi evvelâ kendi nefsine ba‘dehû aslah evlâdına ve eslah evlâd-ı evlâdına ve eslah evlâd-ı evlâd-ı evlâdına batnen ba‘de batnin şart edip ve vakf-ı mezkûrun gallesinden yevmî üçer akçe vazîfe tevliyet ta‘yîn edip bâkīsi beyne’l-evlâd ale’l-iştirâki’s-seviyy taksîm oluna deyü şart ve ta‘yîn eylediği vâkıf-ı mezbûrun işbu yedimizdeki bin doksan dokuz Şevvâli’nin yirmi beşinci günüyle müverrah vakfiyesinde musarrah olmağın hâlâ zikr olunan odaların beher şehr gallesinden hâsıl olan yüz paranın ber-mûceb-i şart-ı vâkıf mezbûr otuz parası vazîfe-i tevliyet olup bâkī yetmiş parası mütevellîye-i mezbûre Hadîce Hatun ile beynimizde iktisâb etmek üzere ittifâk eylediğimizden sonra târîh-i kitâba gelince vakf-ı mezbûr gallâtından makbûzât ve masrûfâtımıza müte‘allıka âmme-i de‘âvîden her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Ali Ağa b. İsmail, Hasan Ağa b. Mehmed, Mehmed Çelebi b. Abdi, Mehmed Beşe b. Ahmed, Mustafa b. Mehmed el-muhzır