Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 232 Hüküm no: 212 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Solakbaşı Mehmed Ağa’nın varislerinin kendilerine kalan ev ve boş arsayı Afife Hatun’a sattıkları Mübâya‘a Mahmiye-i İstanbul’da Hoşkadem mahallesinde sâkin iken bundan akdem vefât eden Solakbaşı Mehmed Ağa b. el-Hâc Ahmed b. Abdullah’ın verâseti li-ebeveyn er karındaşı Solakbaşı diğer Mehmed Ağa ile li-ebeveyn kız karındaşları Saliha ve Âişe nâm hatunlara münhasıra kable’l-kısmet mezbûre Âişe dahi vefât edip verâseti sadrî kebîr oğlu el-Hâc Mehmed b. Mehmed’e münhasıra olduğu şer‘an zâhir ve mütebeyyen oldukdan sonra zâtı ta‘rîf-i şer‘î ile mu‘arrefe olan merkūme Saliha Hatun ve merkūm el-Hâc Mehmed asâleten ve Solakbaşı mezbûr diğer Mehmed Ağa tarafından bey‘-i âti’z-zikre vekîl olduğu ber-nehc-i şer‘î sâbit ve sübût-ı vekâletine hükm-i şer‘î lâhık olan İmâm Abdurrahman Efendi b. Ali vekâleten meclis-i şer‘-i şerîf-i enverde zâtı kezâlik ta‘rîf-i şer‘î ile mu‘arrefe olan râfi‘atü’l-kitâb Afife bt. Abdullah nâm hatun muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip müteveffiyân-ı mezbûrânın terekesinden olup bi’l-ırsi’ş-şer‘î bizlere isâbet ve intikāl etmekle zikri câî akdin sudûruna değin yedimizde mülk ve hakkımız olan mahmiye-i merkūmede Hobyar mahallesinde vâki‘ iki tarafdan Hacı Osman Ağazâde İbrahim menzili ve bahçesi ve bir tarafdan Fâtıma Hatun arsası ve taraf-ı râbi‘i tarîk-i âm ile mahdûd tûlen ve arzen bi-hesâb-ı terbî‘î yüz elli zirâ‘ mülk menzil ve arsa-i hâliyesini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi’l-asâle ve bi’l-vekâle merkūme Afife Hatun’a yüz yedi guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûre yüz yedi guruşu her birimiz asâleten ve vekâleten bi-kadri’l-hisse merkūme Afife Hatun yedinden ahz u kabz eyleyip arsa-i mahdûde-i mezkûrenin gabn ü tağrîrine müte‘allıka âmme-i da‘vâdan merkūme Afife Hatun’un zimmetini ibrâ ve ıskāt eyledik min-ba‘d arsa-i mahdûde-i mezkûreden bizim ve müvekkil-i mezbûr Solakbaşı diğer Mehmed Ağa’nın kat‘an alâka ve medhalim kalmamışdır keyfe mâ teşâ ve tehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Mehmed b. Mustafa el-Eyyûbî, es-Seyyid Mustafa b. es-Seyyid Hasan, el-Hâc Mustafa b. el-Hâc Mehmed, Ahmed b. Mustafa, Hüseyin Çelebi b. el-Hâc Hasan, Mehmed Çelebi b. Abdullah, el-Hâc Mehmed b. Hüseyin, Mehmed b. Ahmed, Mehmed b. Mustafa, Ali b. Ahmed, İsmail b. Mustafa, Salih b. Mustafa