Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 233 Hüküm no: 213 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma Hatun’a borcu olan Abdullah Efendi’nin borcunu varisi olduğunu ispat eden Zeyneb Hatun’a ödediği hakkında terkin edilmiş kayıt < İsbât-ı verâset Fi’l-asl vilâyet-i Anadolu’da Gölpazar-ı Bolu kasabası ahâlîsinden olup mahmiye-i İstanbul’da Kızlarağası mahallesinde sâkine ve ber-vech-i âtî verâset iddi‘â eden râfi‘atü hâze’l-kitâb Zeyneb bt. Ali nâm hatun meclis-i şer‘-i hatîr-ı lâzımü’t-tevkīrde mahmiye-i mezbûrede Bayram Paşa Türbesi’nde türbedâr olan es-Seyyid Abdullah Efendi b. es-Seyyid Mehmed Emin nâm kimesne mahzarında üzerine da‘vâ ve takrîr-i kelâm edip mahalle-i mezbûrede sâkine iken bundan akdem vefât eden Fâtıma Hatun’un babası Receb benim babam mezbûr Ali ile li-eb karındaşlar olup babaları ismi Mustafa ve dedeleri ismi Rasûl ve maskat-ı re’sleri sâlifü’z-zikr Gölpazar-ı Bolu kasabası olup müteveffât-ı mezbûre Fâtıma Hatun’un zî-rahm cihetinden verâseti bana münhasıradır, benden gayrı vârisi ve terekesine müstahıkk-ı âharı olmamağla müteveffât-ı mezbûre Fâtıma Hatun’un mezbûr es-Seyyid Abdullah Efendi zimmetinde cihet-i karzdan dokuz guruş hakkı olup kable’l-ahz fevt olmağla meblağ-ı mezbûru mezbûr es-Seyyid Abdullah Efendi’den bi’l-verâse taleb ederim, suâl olunup bana edâya tenbîh olunması murâdımdır dedikde gıbbe’s-suâl mezbûr es-Seyyid Abdullah Efendi cevâbında fi’l-hakīka müteveffât-ı mezbûre Fâtıma Hatun’a cihet-i mezkûreden zimmetinde dokuz guruş deyni olduğunu ikrâr lâkin müdde‘iye-i mezbûrenin ber-vech-i muharrer verâsetini inkâr edicek müdde‘iye-i mezbûre Zeyneb Hatun’dan ber-vech-i muharrer müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre sâkinlerinden Mehmed Ağa b. Mehmed Efendi ve Mehmed Çelebi b. Veliyüddin ve İbrahim b. Mehmed nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ vilâyet-i Anadolu’da Gölpazar-ı Bolu kasabası ahâlîsinden olup mahmiye-i İstanbul’da Kızlarağası mahallesinde sâkine iken bundan akdem vefât eden Fâtıma Hatun’un babası Receb işbu müdde‘iye-i mezbûre Zeyneb Hatun’un babası Ali ile li-eb karındaşlar olup babaları ismi Mustafa ve dedeleri ismi Rasûl ve maskat-ı re’sleri vilâyet-i Anadolu’da Gölpazar-ı Bolu kasabası olup müteveffât-ı mezbûrenin verâseti zî-rahm cihetinden müdde‘iye-i mezbûre Zeyneb Hatun’a münhasıradır, gayri vârisi ve terekesine müstahıkk-ı âhar olduğu ma‘lûmumuz değildir, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh müdde‘iye-i mezbûre Zeyneb Hatun meclis-i şer‘de mezbûr es-Seyyid Abdullah Efendi mahzarında ikrâr ve takrîr-i kelâm edip ânifen edâsına tenbîh olunan meblağ-ı mezbûr dokuz guruşu mezbûr es-Seyyid Abdullah yedinden tamâmen ahz u kabz eyledim dedikde mâ hüve’l-vâki‘ bi’t-taleb ketb olundu. Fî-selhi Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Halil Ağa b. İbrahim, Mehmed Çelebi b. Abdullah, Mehmed b. Süleyman, Kayıkcı Mustafa b. Mehmed, Mustafa b. Mehmed, Hacı Hüseyin Çelebi b. Mehmed, Ali b. Abdullah ve gayruhum>>