Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 234 Hüküm no: 214 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa ile Kantarcı İbrahim’in boşandıkları Nafaka Mahrûse-i Galata’da Kulekapısı hâricinde sâkine ve zâtı babası Mustafa b. Ömer ve el-Hâc İsmail b. Hasan nâm kimesneler ta‘rîfleriyle mu‘arrefe olan Fâtıma bt. el-mezbûr Mustafa nâm hatun meclis-i şer‘-i hatîr-ı lâzımü’t-tevkīrde zevc-i muhâla‘ı bâ‘isü’l-kitâb Kantarcı İbrahim Çelebi b. Hüseyin nâm kimesne mahzarında ikrâr ve takrîr-i kelâm edip mezbûr İbrahim Çelebi zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan kırk guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr İbrahim Çelebi ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezkûru kabûl eylediğinden sonra ben hukūk-ı zevciyete ve târîh-i kitâba gelince sâir hukūk-ı ma‘lûme ve mechûleye müte‘allıka âmme-i de‘âvî ve muhâsamât ve kâffe-i mutâlebât ve eymândan mezbûr İbrahim Çelebi’nin zimmetini ibrâ-i âmm-ı katı‘u’n-nizâ‘la ibrâ ve ıskāt eylediğimde ol dahi ibrâ-i mezkûru ba‘de’l-kabûl vech-i muharrer üzere hukūk-ı zevciyete ve sâire müte‘allıka âmme-i de‘âvî ve muhâsamât ve kâffe-i mutâlebât ve eymândan benim zimmetimi ibrâ-i âmm-ı katı‘u’n-nizâ‘la ibrâ ve ıskāt eyledi ba‘de’l-yevm mezbûr İbrahim Çelebi ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn fî M sene 1153. Şuhûdü’l-hâl: İmâm Mehmed Efendi b. Mustafa, Abdullah Hoca b. Pîr Ali, Halatcılar kethüdâsı Hasan b. Ali, Mütevellî el-Hâc Mustafa b. Mehmed, el-Hâc İsmail b. Hasan