Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 235 Hüküm no: 215 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Süleyman’ın Ürgüb nahiyesindeki zeameti üzerine kaydettirmek üzere Zeynelabidin Bey’i vekil tayin ettiği Vilâyet-i Rumeli’de Havâss-ı Prizrin kazâsına tâbi‘ Kukumca nâm karye ahâlîsinden olup mahmiye-i İstanbul’da Sultan Mehmed Hân -aleyhi’r-rahmetü ve’l-gufrân- Câmi‘-i şerîfi kurbünde Şekerciler Hanı’nda misâfiren sâkin Osman b. Süleyman nâm kimesne meclis-i şer‘-i hatîr-ı lâzımü’t-tevkīrde bâ‘is-i hâzihi’l-vesîka Zeynelabidin Bey b. Hasan muvâcehesinde ikrâr-ı tâm ve takrîr-i kelâm edip mezbûr Zeynelabidin Bey Alacahisar sancağında Ürgüb nâhiyesinde Kürneplan? nâm karye ve gayrıdan yirmi bir bin akçe yazılı ze‘âmetini üzerime sancağ-ı mezbûr alaybeyinden arz mûcebince tevcîh ve berât-ı âlîşân ettirip ve iktizâ eden mesârifini dahi bi-şartı’r-rücû‘ mâlından harc ü sarf etmek için bundan akdem mezbûr Zeynelabidin Bey’e emr etmiş idim, ol dahi emrime binâen ze‘âmet-i mezbûrenin arzı ve tevcîhi ve berât-ı âlîşânı ve harcırâhı ve sâir beynimizde ma‘lûm mahaller için ma‘lûmü’l-esâmî ve’l-eşhâs kimesnelere bin iki yüz guruş harc ü sarf etmekle ben dahi kabûl edip meblağ-ı mezbûr bin iki yüz guruş hâlâ zimmetimde mezbûr Zeynelabidin Bey’e edâsı lâzım deynim oldukdan sonra berât-ı âlîşân ile mutasarrıf olduğum ze‘âmet-i mezkûreyi bin yüz elli üç senesi Saferi’l-hayrı gurresinden elli dokuz senesi gāyetine gelince beher senesi ikişer yüz guruşdan altı sene tamâmına değin bin iki yüz guruşu mezbûr Zeynelabidin Bey’e deruhde ve iltizâm eylediğimde ol dahi ber-vech-i muharrer kabûl eyledikden sonra ze‘âmet-i mezkûrenin a‘şâr-ı şer‘iyye ve rüsûm-ı örfiye ve sâir cüz’î ve küllî mahsûlâtından senevî hâsıl olan ikişer yüz guruşdan sinîn-i merkūmede bin iki yüz guruşu ba‘de’t-tahsîl kendüye vech-i meşrûh üzere deynim olan bin iki yüz guruşa takas ve mahsûb etmek için tarafımdan mezbûr Zeynelabidin Bey’i tevkîl ettiğimde ol dahi vekâlet-i merkūmeyi kabûl eyledi dedikde mezbûr Zeynelabidin Bey mukırr-ı merkūm Osman’ı cemî‘ takrîr-i meşrûhunda vicâhen ve şifâhen tahkīk ve tasdîk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Mehmed Efendi b. Abdurrahim el-kādı, Ali tâbi‘-i Uzun Hasan Ağa, Opulalı Ali Sipâhi, Üsküb Çeribaşı Ahmed Sipâhi, Kocacık Dizdârı İsmail Ağa, Depreli Uzun Hasan Ağa, …? Ağası Hüseyin Ağa, Mehmed Ağa b. Ahmed