Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 236 Hüküm no: 216 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun ile onun yanında çalışan Zeyneb Hatun’un aralarındaki alacak davasına sulh bedeli karşılığı son verildiği İbrâ-i sulh Mahmiye-i İstanbul’da Haraccı Muhyiddin mahallesinde sâkine olup zâtı el-Hâc Mehmed b. İbrahim ve Mehmed Usta b. Abdullah nâm kimesneler ta‘rîfleriyle mu‘arrefe olan Zeyneb Hatun bt. Hasan meclis-i şer‘-i lâzımü’t-tevkīrde bâ‘isetü hâzihi’l-vesîka Havva bt. Mustafa nâm hatun muvâcehesinde ikrâr ve takrîr-i kelâm edip mezbûre Havva Hatun’a talebiyle bundan akdem birkaç sene hizmet etmekle ecr-i mislimi taleb ederim deyü da‘vâya tasaddî edip beynimizde münâza‘ât-ı kesîre cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni mezbûre Havva Hatun ile kıymetleri beynimizde ma‘lûm bir yemenî yorgan ve bir minder ve bir yasdık ve bir hatâî anteri ve bir don ma‘a gömlek ve bir tencere ve iki sahan üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan eşyâ-i muharrere-i mezkûreyi mezbûre Havva Hatun yedinden tamâmen ahz u kabz edip ücret-i merkūmeye müte‘allıka âmme-i da‘vâdan mezbûre Havva Hatun’un zimmetini ibrâ ve ıskāt eylediğimde ol dahi bedel-i sulh olan eşyâyı mezkûreye müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: el-Hâc Mehmed b. İbrahim, Mehmed Usta b. Abdullah, Mustafa b. Abdurrahman, Mustafa Odabaşı b. Mehmed, Abdullah Çelebi b. Mehmed, Ali Odabaşı b. Mehmed, Mehmed b. Ahmed