Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 237 Hüküm no: 218 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador’un Bedros’a rehin olarak verdiği eşyalar konusundaki anlaşmazlığa sulh bedeli karşılığı son verildiği Mahrûse-i Galata’da Beyoğlu’nda Ağa mahallesinde mütemekkin Haçador v. Mardıros nâm zimmî meclis-i şer‘-i şerîf-i enverde bâ‘isü’s-sifr Bedros v. Haçador nâm zimmî muvâcehesinde ikrâr-ı tâm ve takrîr-i kelâm edip bundan akdem mesfûr Bedros zimmî yedinden istidâne ve kabz eylediğim altmış altı guruş seksen akçe mukābelesinde mecmû‘u doksan guruş kıymetli yirmi miskāl bir çift altın bilezik ve beş miskāl bir altın gerdanlık ve bir çuka biniş ve bir hâre cübbe ve bir Şam alacası kaftan ve sâir beynimizde ma‘lûm eşyâlarımı mesfûr Bedros’a bi-tarîkı’r-rehn vaz‘ ü teslîm etmiş idim. Mârrü’z-zikr eşyâlarım mevcûd ise a‘yânını müstehlek ise ba‘de’s-sübût kıymet-i şer‘iyyeleri mesfûr Bedros zimmîden taleb ederim deyü da‘vâ sadedinde olduğumda beynimizde münâza‘ât-ı kesîre cereyân etmiş idi, el-hâletü hâzihi beynimize muslihûn tavassut edip da‘vâ-yı mezkûremden beni mesfûr Bedros zimmî ile otuz guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezkûru ba‘de’l-kabûl ve bedel-i sulh olan meblağ-ı mezbûr otuz guruşu mesfûr Bedros zimmî yedinden tamâmen ahz u kabz eylediğimden sonra husûs-ı mezkûra ve sâir târîh-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebât ve eymân ve muhâsamâtdan her birimiz âharın zimmetini ibrâ ve ıskāt eyledik ba‘de’l-yevm birbirimiz ile vechen mine’l-vücûh ve sebeben mine’l-esbâb kat‘an da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Muharremi’l-harâm sene 1153. Şuhûdü’l-hâl: Ahmed Ağa b. Ahmed, el-Hâc İbrahim b. Hasan, el-Hâc Süleyman b. Abdullah, Hüseyin Ağa b. el-Hâc Mehmed, Mehmed b. Süleyman, Andriye v. Abraham, Kasber v. Melkon, Kiryako v. Yani, Panayot v. Yani, Kirkor v. Abraham