Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 238 Hüküm no: 219 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazlı bt. Şahin’in istiğlâl yoluyla Ahmed Paşa kızları olan Emine ve Rukiye hanımlardan borç aldığı Husûs-ı âti’l-beyânı mahallinde ketb ü tahrîr için cânib-i şer‘-i enverden irsâl olunan Mevlânâ Ömer Efendi b. Nurullah Efendi vezîr-i ekrem ve müşîr-i efham munazzımu nizâmü’l-âlem müşeyyidü umûr-ı ümem bi’r-re’yi’s-sâib ve’l-kalem devletlü sa‘âdetlü Tevkī‘î el-Hâc Ahmed Paşa -yesserahullâhu te‘âlâ hayra’l-umûr- alâ mâ yeşâ’ü hazretlerinin mahmiye-i İstanbul’da Şeyhzâde Câmi‘-i şerîfi civârında vâki‘ saray-ı âlîlerine varıp hâlâ hazînedârlıkları hizmet-i aliyyeleriyle şeref-yâbı mefharü’l-emâsil ve’l-akrân sa‘âdetlü el-Hâc Mehmed Ağa hazretlerine mahsûs oda-i refî‘ada zeyl-i vesîkada muharrerü’l-esâmî a‘yân-ı Müslimîn ve muvahhidîn huzûrlarında akd-i meclis-i şer‘-i âlî eyledikde mahmiye-i mezbûrede Davudpaşa Câmi‘-i şerîfi kurbünde Sancakdâr Hayreddin mahallesinde mütemekkine zâtı Molla Ali b. Ebubekir ve Ali b. Ahmed nâm kimesneler ta‘rîfleriyle mu‘arrefe olan Nazlı bt. Şahin nâm Nasrâniye meclis-i ma‘kūd-ı mezkûrda hazret-i vezîr-i müşârün-ileyhin kerîme-i muhteremeleri umdetü’l-muhadderât zübtedü’l-muvakkarât iffetlü ve ismetlü sâhibetey-i hâze’l-kitâbi’l-müstetâb Emine Hanım ve Rukiye hanım -dâmet ismetuhâ- hazretleri taraf-ı bâhirü’ş-şereflerinden akd-i âti’z-zikri tasdîka vekîl-i şer‘îleri hazînedâr-ı mûmâ-ileyh el-Hâc Mehmed Ağa b. Abdurrahman mahzarında ikrâr-ı tâm ve takrîr-i kelâm edip istiğlâl-i âti’z-zikrin sudûruna değin yedimde mülk ve hakkım olup mahrûse-i Galata’ya tâbi‘ Beyoğlu kurbünde Tomtom mahallesinde vâki‘ bir tarafdan ba‘zan Soğancıbaşı el-Hâc Ahmed Efendi [31a] ve veresesi mülkü ve ba‘zan Yahûdihâne ve iki tarafdan saray ağası mülkü ve bir tarafdan tarîk-i âm ile mahdûd tabaka-i ulyâda üç bâb oda ve dehliz ve vüstâda üç bâb oda ve bir sofa ve dehliz ve bir matbah ve süflâda bir sagīr oda ve çamaşırhâne ve bir kenîf ve mahzen ve ahur ve bi’r-i mâ ve bir sahrınç ve bahçe ve derûn-ı bahçede bir köşkü müştemil mülk menzilimi fârigan ani’ş-şevâgil cemî‘ tevâbi‘ ve levâhıkıyla ber-vech-i iştirâk müvekkiletân-ı müşârün-ileyhimâ hazretlerine bi-tarîkı’l-istiğlâl iki bin beş yüz guruşa bey‘ ve teslîm eylediğimde müşârün-ileyhimâ hazretleri ber-vech-i muharrer iştirâ ve tesellüm ve kabûl buyurduklarından sonra semeni olan meblağ-ı mezbûr iki bin beş yüz guruşu hazret-i müşârün-ileyhimânın mâllarından olmak üzere vekîlleri mûmâ-ileyh el-Hâc Mehmed Ağa yedinden tamâmen ahz u kabz eylediğimden sonra vekîl-i mûmâ-ileyh bi’l-vekâle menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan bir sene tamâmına değin üç yüz altmış guruşa bana îcâr ve teslîm eylediğinde ben dahi istîcâr ve kabûl eyledim dedikde gıbbe’t-tasdîkı’ş-şer‘î mesfûre Nazlı meclis-i mezkûrda hazret-i müşârün-ileyhin kapıcılar bölükbaşısı fahrü’l-akrân el-Hâc Mehmed Ağa b. Abdullah mahzarında i‘âde-i kelâm edip mebî‘-i mezbûr hakīkatde rehin ve meblağ-ı mezbûr müşârün-ileyhimâ hazretlerine zimmetimde edâsı lâzım deynim olmağla meblağ-ı mezbûr ile ücret-i merkūmeyi müddet-i mezkûre tamâmında müşârün-ileyhimâ hazretlerine edâ edemez isem menzil-i mezkûru sûk-ı sultânîde müzâyede ile ba‘de’n-nidâ ve ınkıtâ‘i’r-rağbet semen-i misli ile âhara bey‘ ve teslîm ve semeni ba‘de’l-kabz deyn-i mezkûr ile ücret-i merkūmeyi müşârün-ileyhimâ hazretlerine edâ ve teslîm, fazla kalır ise bana îsâl ve teslîme ve bunlar mütevakkıf olduğu umûrun küllîsine küllemâ aziltüke fe-ente vekîlî mefhûmu üzere azl ü in‘izâlden masûne ve akd-i rehinde meşrûta ve vekâlet-i devriye ile mezbûr el-Hâc Mehmed Ağa’yı tarafımdan vekîl ve nâib-i menâb nasb u ta‘yîn eyledim dedikde mezbûr el-Hâc Mehmed Ağa dahi ber-vech-i muharrer vekâlet-i mezbûreyi kabûl ve merâsimini edâya ta‘ahhüd ve iltizâm eylediğini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan ümenâ-i şer‘ ile meclis-i şer‘-i envere gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb ü terkîm olundu. Fi’l-yevmi’s-sânî min-Saferi’l-hayr sene 1153. Şuhûdü’l-hâl: Ali b. Ahmed, Musa Çelebi b. Halil, Molla Ali b. Ebubekir, Mustafa Çelebi b. Osman, Çukadâr Hasan Ağa b. Ali, fahrü’l-emâsil el-Hâc Ahmed Ağa b. Ali, fahrü’l-eşbâh Hüseyin b. Celaleddin