Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 239 Hüküm no: 220 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Beşe’nin sahibi olduğu bağ, bahçe, şirehane ve bazı eşyasını oğlu Ali’ye sattığı Mübâya‘a Fi’l-asl vilâyet-i Anadolu’da Ürgüb kazâsı muzâfâtından Aravani nâm karye ahâlîsinden olup mahmiye-i İstanbul’da Langabeyi kapısı hâricinde sâkin Ebubekir Beşe b. Ali nâm kimesne meclis-i şer‘-i hatîr-ı lâzımü’t-tevkīrde işbu bâ‘isü’l-kitâb sulbî kebîr oğlu Ali nâm kimesne tarafından ikrâr-ı akd-i âti’z-zikri tasdîka vekîl olduğu Ahmed b. Receb ve Yusuf b. Şa‘bân nâm kimesneler şehâdetleriyle sâbit olan Mehmed Beşe b. Ali nâm kimesne mahzarında ikrâr-ı tâm ve takrîr-i kelâm [edip] sâlifü’z-zikr Aravani karyesi sâkinlerinden iken mukaddemâ vefât eden İbrahim Beşe b. Mehmed b. Yusuf nâm kimesne hâl-i hayâtında ve kemâl-i akl-ı sıhhatinde yedinde mülk ve hakkı iken bana hîbe ve teslîm ben dahi meclis-i hîbede ittihâb ve kabûlüm ile silk-i mülküme dâhil olup akd-i âtî sudûruna değin yedimde mülk ve hakkım olan karye-i mezbûrede vâki‘ işbu yedimdeki hüccet-i hîbe ve hükm-i i‘lâmı mantûkunca ma‘lûmü’l-hudûd ve’l-müştemilât iki kıt‘a bağ ve bir kıt‘a bahçe ve bir bâb şirehâne ve şirehâne önünde kezâlik ma‘lûmü’l-hudûd ve’l-müştemilât bir kıt‘a dahi bahçe ve iki çift lengeri ve bir kaliçe ve bir tencere ve beş vakıyye bir leğen ve on iki re’s koyununu bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ve sarîh-i mer‘î ile oğlum kebîr-i mezbûr Ali’ye bi-safkatin vâhidetin altmış guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr altmış guruşu oğlum müşteri-yi mezbûr Ali yedinden tamâmen ahz u kabz eyledim fîmâ-ba‘d eşyâ-i ma‘dûde-i mezkûre oğlum mezbûr Ali’nin emlâk-i müşteriyesi ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde vekîl-i mezbûr Mehmed Beşe dahi mukırr-ı mezbûru ikrâr-ı meşrûhunda vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Yağcı Ali Beşe b. Abdullah, İsmail Beşe b. Ali Beşe, Küçük Mehmed Beşe b. Mustafa, Ömer Yazıcı b. Mehmed, Halil Beşe b. Eyüb, Ali Beşe b. Mustafa, Molla Ahmed b. Musa tâbi‘-i Mehmed Efendi, Rüstem Çelebi b. Abdullah, Mustafa b. Osman, Tahtacı Mehmed Ağa b. Abdullah, Ahmed Beşe b. Mustafa, Hasan Beşe b. Mehmed