Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 240 Hüküm no: 221 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın evini Mehmed b. Abdullah’a sattığı Bâ-mühr-i efendi Mahmiye-i İstanbul’da Kâtibkasım mahallesinde sâkine ve zâtı mahalle-i mezbûre imâmı Mustafa Efendi b. Nasuh ve Müezzin Halîfe b. el-Hâc İbrahim nâm kimesneler ta‘rîfleriyle mu‘arrefe olan Emine bt. Mustafa nâm hatun meclis-i şer‘-i şerîf-i enverde sâhib-i hâzihi’l-vesîka Mehmed b. Abdullah b. Abdurrahman nâm kimesne tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Kantarcı el-Hâc Mustafa Çelebi b. Ali nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna dek yedimde mülküm olup mahalle-i mezbûrede vâki‘ iki tarafdan Koca Sarı zimmî harâbesi ve bir tarafdan Âişe Hatun menzili ve bir tarafdan tarîk-i âm ile mahdûd fevkānî iki bâb oda ve bir tahta-pûş ve tahtânî bir bâb oda ve bir matbah ve iki bi’r-i mâ ve bir mikdâr havlu ve bir tarafdan taş duvarı müştemil menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile üç yüz guruşa müvekkil-i mezbûr Mehmed’e bey‘ ve teslîm eylediğimde ol dahi iştirâ ve tesellüm ve kabûl ve semeni olan meblağ-ı mezbûr üç yüz guruşu bana teslîm eylediğinde ben dahi yedinden bi’t-tamâm tesellüm ve ahz u kabz eyledim ba‘de’l-yevm menzil-i mahdûd-ı mezkûrede benim aslâ alâka ve medhalim kalmayıp müvekkil-i mezkûr Mehmed’in mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Saferi’l-hayr sene 1153. Şuhûdü’l-hâl: [31b] Abdülmümin b. Mehmed, Berber es-Seyyid Mustafa b. Mehmed, Mehmed Çelebi b. Mustafa, Tuzcu Mustafa Çelebi b. Ahmed, Berber Mehmed Çelebi b. el-Hâc Fethullah, Ahmed b. Mehmed, el-Hâc Mustafa Ağa b. Ali, Berber Mehmed Beşe b. Mustafa, Berber Mehmed b. Ömer, Hüseyin Çelebi b. Abdullah, Ali b. Mehmed, el-Hâc Ahmed b. Halil, Hasan Ağa b. Salih, Salih Çelebi