Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 241 Hüküm no: 222 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mehmed’in kızı Arife’ye nafaka takdiri < Bundan akdem katîlen hâlik olan Kürkçü Manol zimmînin>> Mahmiye-i İstanbul’da Avratpazarı kurbünde Hobyar mahallesinde sâkine ve zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Fâtıma bt. Mehmed nâm hatun meclis-i şer‘-i şerîf-i enverde zevc-i sâbıkı Arab el-Hâc Abdullah b. Ali nâm kimesne mahzarında takrîr-i kelâm ve ta‘bîr ani’l-merâm edip zevc-i sâbıkım mezbûr el-Hâc Abdullah bundan akdem Mahmudpaşa nâibi fazîletlü Hüseyin Beyefendi huzûrunda muhâla‘a olduğumda mehr-i müeccelim ve nafaka-i iddet ve me’ûnet-i süknâm üzerine ve işbu yedimde olup mezbûr el-Hâc Abdullah’ın firâşından hâsıla sagīre kızım Ârife’yi benden hakk-ı hıdâne sukūtuna değin terbiye ve mâlımdan infâk etmek üzere hul‘ı olup mezbûr el-Hâc Abdullah’ın yedine minvâl-i muharrer üzere muhâla‘a hücceti verilmiş idi, el-hâletü hâzihi ben fakīre ve mu‘sire olup sagīre-i mezbûreyi terbiye ve infâka adem-i iktidârım olmağla babası mezbûrda sagīre-i mezbûre için kadr-ı ma‘rûf nafaka taleb ederim deyü da‘vâ ve mezbûr el-Hâc Abdullah dahi mûsire ve ganiyyedir deyü def‘ etmekle beynimizde münâza‘ât-ı kesîre cereyân etmiş idi, el-hâletü hâzihi beynimizde musli[h]ûn tavassut edip mezbûr Arab el-Hâc Abdullah sagīre-i mezbûrenin nafaka ve kisvesi’çün yevmî üçer para vermek üzere ta‘ahhüd ettikde ben dahi râzıye olup meblağ-ı mezbûr ile sagīre-i mezbûreyi infâk ve iksâya ta‘ahhüd etmemle kıbel-i şer‘den dahi farz ve takdîr olunmak murâdımdır dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ-lehû ve hüsnü-meâb efendi hazretleri dahi mezbûr Arab el-Hâc Abdullah üzerine târîh-i kitâbdan küllü yevm rızâlarıyla üçer para farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr Arab el-Hâc Abdullah üzerine rücû‘a mezbûre Fâtıma Hatun’a izin birle mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: el-Hâc Mustafa b. el-Hâc Mehmed, es-Seyyid Mustafa b. es-Seyyid Hasan, Ahmed b. Şa‘bân, el-Hâc Mehmed