Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 243 Hüküm no: 224 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem asıllı cariyenin fermanla azat edilenlerden olup Hüseyin b. Mustafa ile evlendiği Itıknâme Mahmiye-i İstanbul hısnı ebvâbından Balatkapısı kurbünde el-Hâc İsa mahallesinde fahrü’l-muhadderât Zeyneb Hatun ibneti’l-merhûm el-Hâc İsmail Ağa b. Ahmed’in li-ebeveyn er karındaşı ve tarafından ikrâr-ı âti’z-zikre vekîl olduğu zâtını bi’l-ma‘rifeti’ş-şer‘iyye ârifân Abdullah b. İbrahim ve Mehmed b. Ahmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan fahrü’l-eşbâh Haşim Mehmed Ağa meclis-i şer‘-i şerîf-i Ahmedî ve mahfil-i dîn-i münîf-i ezherde müvekkile-i mezbûreye sâbıkā rıkkıyetini mu‘terife olan bâ‘isetü hâzihi’l-vesîka Âişe nâm-ı diğer Dilşikar bt. Abdullah muvâcehesinde bi’l-vekâle ikrâr-ı tâm ve takrîr-i kelâm edip mezbûre bâ-fermân-ı âlî sebîlleri tahliye olunan Acem cinsinden olmağın kendüyü işbu hâzır bi’l-meclis Hüseyin b. Mustafa yedi bin akçe mehr-i müeccel tesmiyesiyle akd ve tezvîc eylediğine müvekkilem mezbûre Zeyneb Hatun vâkıfe ve muttali‘a olmağla mezbûre Âişe nâm-ı diğer Dilşikar’ı hasbeten lillâhi te‘âlâ ve taleben li-merzâti Rabbihi’l-a‘lâ cemî‘ mâlından tahrîr u i‘tâk ve kayd-ı rıkkıyetden ıtlâk ve harâir-i asliyât silkine idrâc ü ilhâk eyleyip akd-i mezkûru bi’l-velâye tenfîz eyledi ba‘de’l-yevm mezbûre sâir harâir-i asliyât gibi hürre olup mezbûr Hüseyin’in zevce-i menkûha-i sahîhası olmuşdur dedikde mezbûre ve zevci mezbûr Hüseyin vekîl-i merkūmu takrîr-i meşrûhunda tasdîk etmeleriyle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Saferi’l-hayr sene 1153. Şuhûdü’l-hâl: es-Seyyid Ahmed Ağa b. el-Hâc Mehmed, Yusuf Çelebi b. Mehmed, Mehmed Çelebi b. Mehmed, Mehmed Çelebi b. Abdullah, Salih Çelebi b. Süleyman, es-Seyyid Mustafa Ruhalı, el-Hâc Mustafa b. el-Hâc Mehmed, Hüseyin Çelebi b. el-Hâc Mehmed, Halil Çelebi b. İbrahim, Eyüblü Mehmed b. Mustafa