Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 244 Hüküm no: 225 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un boşandığı eşiyle olan alacak davasında sulh olduğu Mahmiye-i İstanbul’da Sarı Nasuh mahallesinde sâkine Fedâî Halil Bey b. Hasan Paşa ve Canbaz Hüseyin Beşe b. Mehmed nâm kimesneler ta‘rîfleriyle mu‘arrefe olan Fâtıma bt. Ahmed nâm hatun meclis-i şer‘-i şerîf-i enverde zevc-i sâbıkı Ömer Beşe b. Mehmed b. Abdullah nâm kimesnenin hâlâ zevce-i menkûhası ve tarafından ikrâr-ı âti’z-zikri tasdîka vekîli olduğu zâtı ârifân-ı mu‘arrifân mezbûrân Halil Bey ve Hüseyin Beşe ta‘rîfleriyle mu‘arrefe olan bâ‘isetü hâzihi’l-vesîka Havva bt. Mehmed nâm hatun muvâcehesinde ikrâr ve takrîr-i kelâm edip müvekkil-i mezbûr Ömer Beşe zevcim olup târîh-i kitâbdan altı ay mukaddem beni bâyinen tatlîk etmekle zimmetinde mütekarrer ve ma‘kūdün-aleyh üç bin akçe mehr-i müeccelim ile cihet-i karzdan elli aded zencirekli altın hakkım zimmetinde kalmışdır deyü müvekkil-i mezbûrdan taleb ve da‘vâya tasaddî eylediğimde [32a] ol dahi cevâbında zimmetinde bir akçe hakkın yokdur demekle beynimizde ba‘de’l-münâza‘a beynimize muslihûn tavassut edip da‘vâ-yı mezkûremden beni müvekkil-i mezbûr ile üç zencirekli altın üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç zencirekli altını müvekkile-i mezbûre Havva Hatun yedinden tamâmen ahz u kabz eylediğimden sonra hukūk-ı zevciyete ve zikr olunan elli altına ve târîh-i kitâba gelince sâir hukūk-ı ma‘lûme ve mechûleye müte‘allıka âmme-i da‘vâdan ben müvekkil-i mezbûr Ömer Beşe’nin zimmetini ibrâ ve ıskāt eylediğimde müvekkil-i mezbûr Ömer Beşe dahi kezâlik benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Saferi’l-hayr sene 1153. Şuhûdü’l-hâl: Ali Çelebi b. Abdullah, es-Seyyid Ali Çelebi b. Mustafa, es-Seyyid Mustafa Çelebi b. es-Seyyid Hasan, Kayıkcı Mustafa b. Mehmed