Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 244 Hüküm no: 226 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdurabbinnebi’nin Acem asıllı olması dolayısıyla azat edilmesi gerektiği Itıknâme Sâbıkā rıkkıyetini mu‘terif ve ber-vech-i âtî kıbel-i şer‘den da‘vâya me’zûn olan uzun boylu, kara kaşlı, kara gözlü, sâhibü’l-vesîka Hasan b. Abdurabbinnebi nâm kimesne ve meclis-i şer‘-i hatîr-ı lâzımü’t-tevkīrde kendüye rakīkı olmak üzere vaz‘-ı yed eden mefharü’l-kitâb İbrahim Efendi b. Osman Efendi b. Abdullah tarafından zikri câî da‘vâda redd-i cevâba, fasl-ı husûmete vekîl olduğu nehc-i şer‘î üzere sâbit ve sübût-ı vekâletine hükm-i şer‘î lâhık olan Mustafa Efendi b. Ali muvâcehesinde üzerine da‘vâ ve takrîr-i müdde‘â edip ben vilâyet-i İran’da Gence kazâsına tâbi‘ Marşan nâm karye ahâlîsinden mezbûr Abdurabbinnebi b. İslâm’ın firâşından hâsıl ve zevce-i menkûhası Nari bt. Abdullah’dan mütevellid olup bâ-fermân-ı âlî sebîlleri tahliye olunan Acem cinsinden iken müvekkil-i merkūm bana rık olmak zu‘muyla bi-gayr-ı hakkın vaz‘-ı yed eder suâl olunup sebîlim tahliye ve müvekkil-i merkūmun kasr-ı yedi’çün vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr cevâbında mevsûf-ı mezbûr Hasan’a müvekkil-i merkūm Çerkes cinsinden rakīkı olmak üzere vaz‘-ı yed eylediğini ikrâr ve mâ‘adâyı ma‘lûmum değildir deyü inkâr edicek mevsûf-ı mezbûrdan ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden ve karye-i mezbûre ahâlîlerinden olup mahmiye-i merkūmede Vezirhanı’nda sâkinler Ahmed b. Mustafa ve Salih b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î Hasan vilâyet-i İran’da Gence kazâsına tâbi‘ Marşan nâm karye ahâlîsinden Abdurabbinnebi b. İslâm’ın firâşından hâsıl ve zevce-i menkûhası Nazlı bt. Abdullah’dan mütevellid olup bâ-fermân-ı âlî sebîlleri tahliye olunan Acem cinsindendir biz bu husûsa bu vech üzere şâhidleriz şehâdet dahi ederiz deyü şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince mevsûf-ı mezbûrun ber-mûceb-i fermân-ı âlî sebîli tahliye ve müvekkil-i merkūmun kasr-ı yedi’çün vekîl-i mezbûra tenbîh birle mâ-vaka‘a bi’t-taleb ketb olundu. Fî 4 S sene 1153. Şuhûdü’l-hâl: Merhabazâde Mehmed Emin Efendi, es-Seyyid Ömer Efendi Babadağı, es-Seyyid Ahmed Efendi Bostanzâde, Mehmed Çelebi b. Abdullah, Hüseyin Çelebi du‘âcı ve gayruhum