Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 245 Hüküm no: 227 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikogos v. Bali’nin evini oğulları Aparton ve Nikogos’a sattığı Mübâya‘a Mahmiye-i İstanbul’da Kefeli mahallesinde mütemekkin Nikogos v. Bali nâm zimmî meclis-i şer‘-i hatîr-ı lâzımü’t-tevkīrde mesfûr Nikogos’un sulbiyân-ı kebîrân oğulları işbu râfi‘ü’s-sifr Aparton ve diğer Nikogos nâm zimmîler muvâcehelerinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk [ve] hakkım olup mahalle-i mezbûrede vâki‘ bir iki tarafdan Keresteci Kirkor zevcesi (°) nâm Nasrâniye tasarrufundaki vakıf menzil ve bir tarafdan papas kızı Meğrem nâm Nasrâniye tasarrufundaki vakıf menzil ve bir tarafdan ba‘zan Palas nâm Nasrâniye mülk arsa-i hâliyesi ve ba‘zan tarîk-i âm ile mahdûd ve tabaka-i ulyâsında iki bâb oda ve bir sofa ve dehliz ve tabaka-i vüstâsında bir bâb oda ve bir matbah odası ve bir kilâr ve bir kenîf ve süflâsında bir bâb sagīr oda ve bir kenîf ve bir müşterek kâriz yolu ve bir bi’r-i müşterek ve bir mikdâr havlu ve eşcâr-ı müsmire ve gayr-ı müsmireyi hâvî bir mikdâr bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile oğullarım mesfûrân Aparton ve diğer Nikogos’a ber-vech-i iştirâk-i seviyy yedi yüz guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr yedi yüz guruşdan oğullarım müşteriyân-ı mesfûrân Aparton ve diğer Nikogos’un zimmetlerini ibrâ ve ıskāt eyledim onlar dahi ba‘de’l-kabûl menzil-i mahdûd-ı mezkûr müşteriyân-ı mesfûrân Aparton ve diğer Nikogos’un iştirâk-i seviyy ile mülk-i müşterek ve hakk-ı sırfları olmuşdur keyfe mâ yeşâ‘ûn ve yehtârân mutasarrıfân olsunlar dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî S sene 1153. Şuhûdü’l-hâl: Mustafa Efendi b. Ahmed el-imâm, Mustafa Efendi b. Abdülbaki el-müezzin, Ahmed Çelebi b. Ali, Abdullah Çelebi b. Mustafa, Halil Çelebi b. Abdullah, Mehmed Ağa b. Abdullah tahtacı, Papa Avanes v. Mihail, Papa Mail v. Ermiye, Bedros v. Nikogos, Kirkor v. Arslan