Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 246 Hüküm no: 228 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nasuh b. Hasan’ın vakfettiği eve Bayezid Ağa Camii müezzinleri İbrahim ve Mehmed’in de tasarrufuna izin verildiği Mahmiye-i İstanbul hısnı ebvâbından Topkapısı dâhilinde vâki‘ Bayezid Ağa Câmi‘-i şerîfinde müezzin olan İbrahim Halîfe b. Mehmed ve Mehmed Halîfe b. Mehmed (sah) meclis-i şer‘-i şerîf-i enverde câmi‘-i mezbûr imâmı İbrahim Efendi b. Mehmed mahzarında üzerine da‘vâ ve takrîr-i kelâm edip mahalle-i mezbûre ahâlîsinden ashâb-ı hayrâtdan Nasuh b. Hasan nâm sâhibü’l-hayrın mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât menzili işbu yedimde olup dokuz yüz otuz bir senesi târîhiyle müverrah ve târîh-i merkūmda İstanbul kādısı olan Sadi Efendi b. İsa imzâsıyla mümzât olan vakfiye-i mezkûrede süknâ ve tasarrufunu evvelâ kızı Fâtıma’ya ba‘dehû evlâd-ı evlâdına ba‘dehû kızları Râbia ve Cennet’e ve evlâdlarına ve evlâd-ı evlâdlarına ba‘de inkırâzi’l-kül câmi‘-i mezkûrda imâm ve müezzin olanlara süknâ ve tasarrufunu vakf ve tertîb-i zükûr üzere süknâ ve tasarruf tevliyetlerinde olanlar senede bir hatm-i şerîf tilâvet ve rûh-ı vâkıf-ı mezkûra ihdâ edeler deyü şart edip hâlâ evlâd munkariz olmağla nevbet-i süknâ ve tasarruf câmi‘-i mezkûrda imâm [ve] müezzin olanlara gelip bizler dahi câmi‘-i mezkûrda müezzin olup süknâ ve tasarrufunda imâm-ı mezbûr ile şart-ı vâkıf üzere müşterek olmak iktizâ ederken imâm-ı mezbûr İbrahim Efendi vakf-ı mezbûra bâ-hüccet-i şer‘iyye hasbî mütevellîyim deyü menzil-i mezkûrun süknâ ve tasarrufunu yalnız kendi edip bizleri müdâhaleden men‘ etmekle suâl olunup şart-ı vâkıf-ı merkūm üzere bizler dahi imâm-ı mezbûr ile süknâ ve tasarrufunda müşterek olmak matlûbumdur dediklerinde gıbbe’s-suâl imâm-ı mezbûr İbrahim Efendi vakfiye-i mezkûrda olan cemî‘ şart-ı merkūmu ve müezzin-i mezbûrun kelimât-ı meşrûhasını ikrâr ve i‘tirâf etmeğin süknâ ve tasarrufunda müezzinân-ı mezbûrân İbrahim Halîfe ve imâm-ı merkūm İbrahim Efendi ile müşterek olmak üzere tasarruflarına ve süknâlarına tenbîh birle mâ-vaka‘a bi’t-taleb ketb olundu. Fî 3 S sene 1153. Şuhûdü’l-hâl: Ahmed Efendi b. Hasan, Hâfız Mustafa Efendi b. Ahmed, Molla Halil b. Ahmed, Molla Mehmed Emin b. Ahmed, İmâm Ahmed Efendi b. Mustafa, İbrahim Çelebi b. Mehmed, Ali Çelebi b. Mustafa, Ahmed Efendi b. Mehmed hammâmî, Ali Çelebi b. Abdullah ve gayruhum