Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 248 Hüküm no: 230 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani ve Manol’un sahip oldukları bakkal dükkânını Lefter’e sattıkları Havâss-ı refî‘a kazâsına tâbi‘ Makrihora nâm karyede sâkin iken bundan akdem hâlik olan Dimitri v. Yorgi v. Dimitri nâm zimmînin verâseti zevce-i metrûkesi Hayro bt. Rizo nâm Nasrâniye ile sulbî kebîr oğulları Yani ve Yorgi ve sulbiye kebîre kızları Agori ve Kali ve Fanko ve Mariye’ye münhasıra ve tashîh-i meseleleri altmış dört sehmden olup sihâm-ı mezkûreden sekiz sehmi zevce-i mezbûre Hayro’ya ve on dörder sehmi merkūmân Yani ve Yorgi’den her birine ve yedişer sehmi mesfûretân Agori ve Kali ve Fanko ve Mariye’den isâbeti tahakkukundan sonra mezbûr Yani zimmî ile zikr-i âtî dükkânın nısfına mutasarrıf olan Manol v. Nikola nâm zimmî asâleten ve merkūmun Yorgi ve Hayro’ya ve Agori ve Kali ve Fanko ve Mariye taraflarından husûs-ı âti’l-beyânda vekîl olduğu şahsı ârifân Hıristo v. Andon [ve] Dimo v. Hıristo nâm zimmîler şehâdetleriyle sâbit olan Nikola v. Yani nâm zimmî vekâleten meclis-i şer‘-i hatîr-ı lâzımü’t-tevkīrde bâ‘isü’s-sifr Lefter v. Yani nâm zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm edip mahmiye-i İstanbul’da Akşemseddin mahallesinde vâki‘ bir tarafdan Mustafa Efendi menzili ve iki tarafdan Abdülaziz Efendi zevcesi menzili ve bir tarafdan tarîk-i âm ile mahdûd fevkinde bir bâb oda ve bir sofa ve dehliz ve kenîfi müştemil altı kepenklik bakkāl dükkânını bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Lefter zimmîye asâleten ve vekâleten bin guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin guruşu asâleten ve vekâleten bi-kadri’l-hısâs merkūm Lefter zimmî yedinden tamâmen ahz u kabz eyledik ba‘de’l-yevm mârrü’z-zikr dükkânda bizim kat‘an alâka ve medhalimiz kalmayıp merkūm Lefter zimmînin mülk-i müşterâsı olmuşdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 S sene 1153. Şuhûdü’l-hâl: Mustafa Efendi b. Mahmud imâm-ı mahalle-i mezbûre, Mehmed Efendi b. Halil el-müezzin, İsmail Çelebi b. Abdullah, Hüseyin Çelebi b. Hasan, el-Hâc Yusuf b. Ahmed, Yazıcı Mustafa b. İbrahim, Çukadâr Mustafa b. Mehmed, Helvacı Mustafa b. Ahmed, Mehmed b. Hasan, Aydın b. Abdulkadir, Süleyman b. Ahmed, Mustafa b. Mehmed, Mustafa b. Ali, İbrahim Ağa b. Ahmed, Ali es-Seyyid b. Mustafa, es-Seyyid Mustafa Beşe ve gayruhum