Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 249 Hüküm no: 231 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma Hatun’a borcu olan Abdullah Efendi’nin, borcunu varisi Zeyneb’e ödediği Fi’l-asl vilâyet-i Anadolu’da Gölpazar-ı Bolu kasabası ahâlîsinden olup mahmiye-i İstanbul’da Kızlarağası mahallesinde sâkine ve ber-vech-i âtî verâset iddi‘â eden râfi‘atü hâze’l-kitâb Zeyneb bt. Ali nâm hatun meclis-i şer‘-i hatîr-ı lâzımü’t-tevkīrde mahmiye-i mezbûrede Bayram Paşa Türbesi’nde türbedâr es-Seyyid Abdullah Efendi b. es-Seyyid Mehmed Emin nâm kimesne mahzarında üzerine da‘vâ ve takrîr-i kelâm edip mahalle-i mezbûrede sâkine iken bundan akdem vefât eden Fâtıma Hatun’un babası Receb benim babam mezbûr Ali ile li-eb karındaşlar olup babası ismi Mustafa ve dedeleri ismi Rasûl ve maskat-ı re’sleri sâlifü’z-zikr Gölpazar-ı Bolu kasabası olup müteveffât-ı mezbûre Fâtıma Hatun hâl-i hayâtında ve kemâl-i akl ü sıhhatinde ben cihet-i mezkûreden vârisesi olup benden gayrı vârisi ve terekesine müstahıkk-ı âhar olmadığını huzûr-ı Müslimînde ikrâr ve işhâd dahi etmekle müteveffât-ı mezbûre Fâtıma Hatun’un mezbûr es-Seyyid Abdullah Efendi zimmetinde cihet-i karzdan dokuz guruş hakkı olup kable’l-ahz fevt olmağla meblağ-ı mezbûru mezbûr es-Seyyid Abdullah Efendi’den bi’l-verâse taleb ederim suâl olunup bana edâya tenbîh olunması murâdımdır dedikde gıbbe’s-suâl mezbûr es-Seyyid Abdullah Efendi cevâbında fi’l-hakīka müteveffât-ı mezkûre Fâtıma Hatun’a cihet-i mezkûreden zimmetinde dokuz guruş deyni olduğunu ikrâr lâkin müdde‘iye-i mezbûrenin ber-vech-i muharrer verâsetini inkâr edicek müdde‘iye-i mezbûre Zeyneb Hatun’dan ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre sâkinlerinden Mehmed Ağa b. Mehmed Efendi ve Mehmed Çelebi b. Veliyüddin ve İbrahim Çelebi b. Mehmed nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ vilâyet-i Anadolu’da Gölpazar-ı Bolu kasabası ahâlîsinden olup mahmiye-i İstanbul’da Kızlarağası mahallesinde sâkine iken bundan akdem vefât eden Fâtıma Hatun bt. Ali b. Mustafa hâl-i hayâtında ve kemâl-i akl ü sıhhatinde işbu müdde‘iye için Zeyneb Hatun’un babası Ali ile benim babam Receb li-eb karındaşlar ve babaları ismi Mustafa ve dede ismi Rasûl ve maskat-ı re’sleri vilâyet-i Anadolu’da Gölpazar-ı Bolu kasabası olup benim zî-rahm cihetinden hasren vârisem olup mezbûre Zeyneb’den gayrı vârisim ve terekeme müstahıkk-ı âhar yokdur bizim huzûrumuzda ikrâr ve ber-vech-i muharrer bizi işhâd eyledi, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de ri‘âyeti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh müdde‘iye-i mezbûre Zeyneb Hatun meclis-i şer‘de mezbûr es-Seyyid Abdullah Efendi mahzarında ikrâr ve takrîr-i kelâm edip ânifen edâsına tenbîh olunan meblağ-ı mezbûr dokuz guruşu mezbûr es-Seyyid Abdullah Efendi yedinden tamâmen ahz u kabz eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Fî-selhi Muharremi’l-harâm sene 1153. Şuhûdü’l-hâl: Ali b. Abdullah, Mustafa Çelebi b. Hacı Mehmed, Hüseyin Çelebi b. Hacı Mehmed, Mustafa b. Mehmed Kayıkcı, Mehmed Ağa b. Abdullah tahtacı, Mehmed b. Süleyman, Mehmed Çelebi b. Abdullah, Halil Ağa b. İbrahim ve gayruhum