Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 250 Hüküm no: 232 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hatun’un eşi Ali’den muhâlaa yoluyla boşandığı Mahmiye-i İstanbul’da Müftî Hamamı kurbünde Altıboğça mahallesinde sâkine olup zâtı mahalle-i mezbûre imâmı Mehmed Efendi b. İbrahim ve İbrahim b. Ahmed nâm kimesneler ta‘rîfleriyle mu‘arrefe olan Nefise bt. Mustafa nâm hatun meclis-i şer‘-i hatîr-ı lâzımü’t-tevkīrde zevc-i dâhili bâ‘is-i hâze’l-kitâb Ali Çelebi b. Halil nâm kimesne mahzarında ikrâr-ı tâm ve takrîr-i kelâm edip mezbûr Ali Çelebi zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi hul‘-i mezbûru ba‘de’l-kabûl hukūk-ı zevciyete ve kendiden iddi‘â eylediğim yedi miskāl bir tek bileziğe ve sâir târîh-i kitâba gelince âmme-i da‘vâdan zevcim mezbûr Ali Çelebi’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mezbûre Nefise Hatun’un halası Saliha bt. Hasan nâm hatun meclis-i şer‘de merkūm Ali Çelebi muvâcehesinde ikrâr ve takrîr-i kelâm edip eğer mezbûre Nefise Hatun ba‘de zamân mezbûr Ali Çelebi’den nesne taleb ve da‘vâ ve ahz u kabz ederse me’hûzuna ben zâminim dedikde mâ-vaka‘a bi’t-taleb ketb olundu. Fi’l-yevmi’s-sâdis min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Halil b. el-Hâc İbrahim, Veli Dedeoğlu el-Hâc Mehmed, es-Seyyid Mustafa b. Hasan, İbrahim b. Ahmed, İmâm Mehmed Efendi b. İbrahim