Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 250 Hüküm no: 233 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ve Mustafa’nın tasarruflarındaki Manisa’nın Umurbeyli köyündeki tımarlarını Mehmed Emin Ağa’ya verdikleri Mahmiye-i İstanbul’da Mesihpaşa mahallesi sükkânından olup Saruhan sancağında Manisa nâhiyesinde Ulurbeyli [Umurbeyli] nâm karye ve gayrıdan on bir bin iki yüz kırk akçe yazılır timâra berât-ı âlîşân ile ber-vech-i iştirâk mutasarrıflar olan Mehmed ve Mustafa veledân-ı Halil meclis-i şer‘-i hatîr-ı lâzımü’t-tevkīrde umdetü’l-emâcid ve’l-a‘yân sâhib-i hâzihi’l-vesîka Mehmed Emin Ağa v. el-Hâc Mustafa muvâcehesinde her biri ikrâr-ı tâm ve takrîr-i kelâm edip berât-ı âlîşân ile ber-vech-i iştirâk-i seviyy mutasarrıf olduğumuz timâr-ı mezkûrumuzu kendi hüsn-i rızâ ve ihtiyârımız ile mûmâ-ileyh Mehmed Emin Ağa’ya ferâğ ve kasr-ı yed ve işbu berât-ı âlîşânı yedine def‘ ü teslîm eylediğimizde mûmâ-ileyh dahi vech-i muharrer üzere kabûl etmekle min-ba‘d timâr-ı mezkûrda bizim aslâ ve kat‘â alâka ve medhalimiz kalmayıp mûmâ-ileyh Mehmed Emin Ağa’nın dâhil-i havza-i tasarrufu olmuşdur, emsâli gibi mutasarrıf olsun dediklerinde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Saferi’l-hayr min-şuhûr li-sene selâse ve hamsîn ve mi’e ve elf. Şuhûdü’l-hâl: La‘lîzâde es-Seyyid Mehmed Ma‘sum Efendi, Yahya Efendi ser-hulefâ-i hâslar, Arif Mehmed Efendi, Mehmed Ağa b. Hasan, Mehmed Ağa tâbi‘-i Yahya Efendi, el-Hâc Mehmed tâbi‘-i Hasim Ağa, Ahmed Beşe b. Mustafa, Abdullah b. Abdullah