Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 251 Hüküm no: 234 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın vasiyetini yerine getirmek üzere kocası Ali Odabaşı’yı vasi tayin ettiği Husûs-ı âti’l-beyânın mahallinde ketb ü tahrîr için bi’l-iltimâs savb-ı şer‘-i enverden irsâl olunan Mevlânâ Bostanzâde es-Seyyid Ahmed Efendi mahmiye-i İstanbul’da Haydari Hüseyin Dede mahallesi ahâlîsinden Ali Odabaşı b. Osman’ın sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mezbûr Ali Odabaşı’nın zevcesi olup zâtı mahalle-i mezbûre ahâlîsinden es-Seyyid Mehmed Çelebi b. Mehmed ve Süleyman Çelebi b. Ahmed nâm kimesneler ta‘rîfleriyle mu‘arrefe olan Hadîce bt. Abdullah b. Abdurrahman nâm hatun meclis-i ma‘kūd-ı mezkûrda zevci bâ‘is-i hâze’l-kitâb mezbûr Ali Odabaşı mahzarında ikrâr ve takrîr-i kelâm edip ben bi-emrillâhi te‘âlâ vefât eylediğimde mezbûr Ali Odabaşı vasiyy-i muhtârım olup cemî‘ terekemi bi’l-vesâye ahz u kabz edip tereke-i mezkûreden gāib ani’l-meclis el-Hâc Hasan nâm kimesneye cihet-i karz-ı şer‘îden deynim olan yüz elli guruşu edâ ve teslîm eylediğinden sonra sülüsünü ifrâz ve sülüs-i mezkûrdan yirmi guruş ıskāt-ı salâtım için vech-i şer‘î üzere fukarâya devr ü tasadduk eyleye ve on guruş hediyeli bir mushaf-ı şerîf iştirâ edip talebe-i ulûmdan bir müstahıkkına verile ve on guruşa bir taş iştirâ eyleyip kabrim üzerine dikile ve eyyâm-ı mu‘tâde[de] it‘âm-ı fukarâ eyleye ve sülüs-i mezkûrdan her ne bâkī kalırsa vücûh-ı birre harc ü sarf ve sülüsân-ı terekemden zevcim mezbûr Ali Odabaşı irsen nısf hissesini ahz u kabz edip ve nısf-ı âharını dahi zâhirde vâris-i ma‘rûf ve ma‘rûfem olmayıp benim için vasiyet bi-mâzâde ale’s-sülüs câiz olmağın bi-hükmi’l-vasiyetihî zevcim merkūm Ali Odabaşı ahz u kabz eyleye deyü vasiyet ve tenfîzine zevcim mezbûr Ali Odabaşı’yı vasiyy-i muhtâr nasb u ta‘yîn eyledim dedikde merkūm Ali Odabaşı dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbağī mahallinde edâya ta‘ahhüd ve iltizâm eylediğini mevlânâ-yı mezbûr mahallinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip âlâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 6 S sene 1153. Şuhûdü’l-hâl: es-Seyyid Ahmed Efendi b. es-Seyyid Ahmed Efendi el-imâm, Mehmed Odabaşı Ağa b. Abdullah, Mehmed Çelebi b. Hüseyin, es-Seyyid Mehmed Çelebi b. es-Seyyid Mehmed, el-Hâc Halil b. Hasan, Süleyman Çelebi b. Ahmed, Mehmed Efendi b. Veliyüddin, Ahmed Çelebi b. Mahmud, el-Hâc İbrahim b. Hüseyin, Muhzır es-Seyyid Mahmud Çelebi b. Hüseyin